ഇടുക്കി കട്ടപ്പനയിൽ സ്വകാര്യ ഹോസ്റ്റൽ മുറിയിൽ യുവതി പ്രസവിച്ചു. കുട്ടി പ്രസവത്തിന് പിന്നാലെ മരിച്ചു. ഇന്നലെ പുലർച്ചെയാണ് സംഭവം. കട്ടപ്പന സ്വകാര്യ ബാങ്കിൽ ജോലി ചെയ്യുന്ന മൂലമറ്റം സ്വദേശിയായ യുവതിയാണ് പ്രസവിച്ചത്. യുവതി അറിയിച്ചതിനെ തുടർന്ന് വീട്ടുകാർ എത്തിപ്പോഴാണ് ഹോസ്റ്റലിലെ വാർഡൻ ഉൾപ്പെടെ വിവരം അറിയുന്നത്. കുട്ടിയുടെ മരണത്തിൽ പോലീസ് കേസെടുത്തിട്ടുണ്ട്.

കാസർകോട് പെരുമ്പള പുഴയിൽ തോണി മറിഞ്ഞ് ഒരാളെ കാണാതായി. അഞ്ച് പേരാണ് തോണിയിലുണ്ടായിരുന്നത്. ഇതിൽ നാല് പേർ രക്ഷപ്പെട്ടു. പെരുമ്പള സ്വദേശി നിയാസിനെയാണ് കാണാതായത്. ഇന്ന് പുലർച്ചെ മണൽവാരാൽ പോയപ്പോഴാണ് അപകടം സംഭവിച്ചത്. വിവരമറിഞ്ഞെത്തിയ പോലീസും ഫയർഫോഴ്‌സും സ്ഥലത്ത് തെരച്ചിൽ തുടരുകയാണ്

സംസ്ഥാനത്ത് വീണ്ടും കൊവിഡ് മരണം. പത്തനംതിട്ടയിലാണ് മരണം റിപ്പോർട്ട് ചെയ്തത്. ഇലന്തൂർ സ്വദേശി അലക്‌സാണ്ടർ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് മരിച്ചത്. 76 വയസ്സായിരുന്നു. ഇന്നലെ പന്ത്രണ്ട് പേരുടെ മരണമാണ് സംസ്ഥാനത്ത് സ്ഥിരീകരിച്ചത്. ഇതോടെ കൊവിഡ് ബാധിച്ച് മരിച്ചവരുടെ എണ്ണം 203 ആയി. കൊവിഡ് മരണം റിപ്പോർട്ട് ചെയ്യുന്നതിലെ ആശങ്കകൾ നീങ്ങിയെന്ന് വിദഗ്ധ സമിതി അധ്യക്ഷൻ ബി ഇക്ബാൽ അറിയിച്ചു. കൊവിഡ് മരണം ആണോ അല്ലയോയെന്നത് സാങ്കേതിക വിഷയമാണ്. സർക്കാർ വിശദീകരണം തൃപ്തികരമാണെന്നും അദ്ദേഹം പറഞ്ഞു

തൃശ്ശൂർ കോടശ്ശേരിമലയിൽ സനീഷ് എന്ന യുവാവിനെ കൊലപ്പെടുത്തിയത് മരത്തിൽ കെട്ടിയിട്ട ശേഷം വെട്ടിയും കല്ല് കൊണ്ട് തലയ്ക്കടിച്ചുമെന്ന് പോലീസ്. നായാടിക്കോളനയിൽ കഴിഞ്ഞ ദിവസമാണ് സംഭവം. സനീഷിന്റെ കൊലപാതകവുമായി ബന്ധപ്പെട്ട് മൂന്ന് പേരെ പോലീസ് അറസ്റ്റ് ചെയ്തിട്ടുണ്ട്. ഇസ്മായിൽ(38), ഇയാളുടെ ഭാര്യ നാഗമ്മയെന്ന സമീറ(22), ബന്ധു അസീസ്(27) എന്നിവരാണ് പിടിയിലായത്. കൊല്ലപ്പെട്ട സനീഷും പ്രതിയായ ഇസ്മായിലും ക്രിമിനൽ കേസുകളിൽ പ്രതികളാണ്. കൂലിപ്പണിയും ഡ്രൈവറുമൊക്കെയായിരുന്നു സനീഷ്. കോളനിയിലെ നിത്യസന്ദർശകനാണ് ഇയാൾ. സംഭവ ദിവസം പ്രതികൾക്കൊപ്പം ഇരുന്ന് ഇയാൾ മദ്യപിക്കുകയും ചെയ്തിരുന്നു….