ആലപ്പുഴയില് നവകേരളാ യാത്രയ്ക്കിടെ യൂത്ത് കോണ്ഗ്രസ് പ്രവര്ത്തകരെ മര്ദിച്ച കേസുമായി ബന്ധപ്പെട്ട പ്രത്യേക അന്വേഷണ സംഘത്തിന്റെ റിപ്പോര്ട്ടില് വ്യക്തത തേടി പൊലീസ് മേധാവി റവാഡാ എ ചന്ദ്രശേഖര്. എഡിജിപി എം ആര് അജിത്കുമാറിനെതിരായ റിപ്പോര്ട്ടിലാണ് തുടര് നടപടി. കേസില് എം ആര് അജിത് കുമാറിന്റെ ഇടപെടല് സംബന്ധിച്ചാണ് എസ്ഐടി തലവനായ എസ് പി ഷൗക്കത്തലി വ്യക്തത വരുത്തേണ്ടത്.
എംആര് അജിത് കുമാറാണ് കേസ് അട്ടിമറിച്ചതെന്നാണ് എസ്ഐടി അന്വേഷണ റിപ്പോര്ട്ടെന്ന വിവരം നേരത്തെ പുറത്ത് വന്നിരുന്നു. എന്ത് നടപടി സ്വീകരിക്കണമെന്നതില് ഡിജിപി നിയമോപദേശം തേടുകയും ചെയ്തു. കേസ് അട്ടിമറിക്കാന് അജിത് കുമാര് ശ്രമിച്ചതിന്റെ തെളിവുകള് നേരത്തെ പുറത്തുവന്നിരുന്നു. റിപ്പോര്ട്ടും അജിത് കുമാറിനെതിരെയാണെന്നാണ് വിവരം. എന്നാല് ഇതുവരെ അജിത് കുമാറിനെതിരെ നടപടിയുണ്ടായില്ല. ഇതോടെ അജിത് കുമാറിനെ സംരക്ഷിക്കുന്ന നിലപാടാണ് യുഡിഎഫ് സര്ക്കാര് സ്വീകരിക്കുന്നതെന്ന വിമര്ശനം ഉയര്ന്നു. അജിത് കുമാറിന് ഡിജിപി റാങ്കിലേക്ക് സ്ഥാനക്കയറ്റം ലഭിക്കാനാണ് ഡിജിപി നടപടിയെടുക്കാതിരിക്കുന്നതെന്നും ആരോപണം ഉയര്ന്നിരുന്നു.
യൂത്ത് കോണ്ഗ്രസ് പ്രവര്ത്തകരെ മര്ദിച്ച കേസില് എഡിജിപി അജിത്കുമാറിനുള്ള സര്ക്കാര് സംരക്ഷണം തുടരുന്നതില് കോണ്ഗ്രസ് യുവജന സംഘടനകള്ക്കുള്ളില് നിന്നും വലിയ വിമര്ശനമാണ് ഉയരുന്നത്. ആഭ്യന്തര മന്ത്രി രമേശ് ചെന്നിത്തല നിസംഗത തുടരുകയാണെന്നാണ് വിമര്ശനം. വിവാദങ്ങള്ക്ക് പിന്നാലെയാണ് റിപ്പോര്ട്ട് കൈമാറാനുള്ള അതിവേഗം നീക്കങ്ങള് നടക്കുന്നത്.
