അവസാന ഓവറിലെ നാലാം പന്തില്‍ ജോഫ്ര ആര്‍ച്ചറുടെ പന്തില്‍ ഗെയ്ല്‍ ക്ലീന്‍ ബൗള്‍ഡാവുകയായിരുന്നു. അര്‍ഹിച്ച സെഞ്ച്വറി നഷ്ടമായതിന്റെ നിരാശയില്‍ ഗെയ്‌ലിന് സമനില നഷ്ടമായി. കൈയിലിരുന്ന ബാറ്റ് നിലത്തടിച്ചാണ് ഗെയ്ല്‍ നിരാശ തീര്‍ത്തത്. നിലത്തടിക്കുന്നതിനിടെ ബാറ്റ് ദൂരത്തേക്ക് തെറിച്ചു പോവുകയായിരുന്നു
63 പന്തില്‍ ആറു ഫോറും എട്ട് പടുകൂറ്റന്‍ സിക്‌സറുകളും സഹിതമാണ് 99 റണ്‍സെടുത്തത്. 99- ന് പുറത്തായെങ്കിലും പവലിയനിലേക്ക് നടക്കുമ്പോള്‍ ബാറ്റില്‍ ഹെല്‍മറ്റ് കോര്‍ത്തായിരുന്നു ഗെയ്‌ലിന്റെ മടക്കം. ബോളര്‍ ജോഫ്ര ആര്‍ച്ചർ കൈയില്‍ തട്ടി ഗെയ്‌ലിനെ അഭിനന്ദിക്കാനും മറന്നില്ല
രാജസ്ഥാനെതിരായ മത്സരത്തിലൂടെ ടി20 ഫോര്‍മാറ്റില്‍ 1000 സിക്സറുകള്‍ പൂര്‍ത്തിയാക്കാനും ഗെയിലിനായി. ഈ നേട്ടം സ്വന്തമാക്കുന്ന ആദ്യ താരമാണ് ഗെയ്ല്‍. നിലവില്‍ 410 മത്സരത്തില്‍ നിന്ന് 1001 സിക്സാണ് ഗെയിലിന്റെ പേരിലുള്ളത്. രണ്ടാം സ്ഥാനത്തുള്ള കീറോണ്‍ പൊള്ളാര്‍ഡിന് 524 മത്സരത്തില്‍ നിന്ന് 690 സിക്സും മൂന്നാം സ്ഥാനത്തുള്ള ബ്രണ്ടന്‍ മക്കല്ലത്തിന് 370 മത്സരത്തില്‍ നിന്ന് 485 സിക്സുമാണ് ഉള്ളത്.
