ഇടുക്കി ചിത്തിരപുരത്ത് വ്യാജ മദ്യം കഴിച്ച് മൂന്ന് പേർ ആശുപത്രിയിലായി. ഇവരുടെ നില ഗുരുതരമാണ്. രണ്ട് പേരെ കോലഞ്ചേരി മെഡിക്കൽ കോളജ് ആശുപത്രിയിലും ഒരാളെ അങ്കമാലി ആശുപത്രിയിലുമാണ് പ്രവേശിപ്പിച്ചത്. രണ്ട് പേരുടെ കണ്ണിന് തകരാറുണ്ട്. ഒരാളുടെ കാഴ്ച നഷ്ടപ്പെട്ടതായും റിപ്പോർട്ടുകളുണ്ട് ചിത്തിരപുരത്തെ സ്വകാര്യ ഹോം സ്‌റ്റേയിൽ വെച്ചാണ് ഇവർ വ്യാജമദ്യം കഴിച്ചത്. ഹോം സ്‌റ്റേ ഉടമ തങ്കച്ചൻ, സഹായി ജോബി, മനോജ് എന്നിവരാണ് ആശുപത്രിയിലായത്. വാറ്റു ചാരായമാണ് ഇവർ കഴിച്ചതെന്നാണ് സൂചന.

പത്തനംതിട്ട റാന്നിയിൽ ഒരാൾ കുത്തേറ്റ് മരിച്ചു. കുറുമ്പൻമൂഴിയിലാണ് സംഭവം. വാക്കുതർക്കമാണ് കത്തിക്കുത്തിൽ കലാശിച്ചത്. കുറുമ്പൻമൂഴി സ്വദേശി ജോളി(55)യാണ് മരിച്ചത്. നാട്ടുകാരനായി സാബുവാണ് ജോളിയെ കുത്തിയത്. സംഘർഷം തടയാൻ ശ്രമിച്ച സമീപവാസിയായ ബാബുവിനും കുത്തേറ്റു. ഗുരുതരമായി പരുക്കേറ്റ ബാബുവിനെ ആശുപത്രിയിൽ പ്രവേശിപ്പിച്ചു. മദ്യപാനത്തിനിടെയാണ് തർക്കമുണ്ടായത്. സാബുവിനെ പോലീസ് പിടികൂടിയിട്ടുണ്ട്.

  കനത്ത ചൂടിൽപ്പെട്ട് സംസ്ഥാനം ഉരുകുമ്പോൾ ആശ്വാസമായി ഇന്ന് മുതൽ വേനൽ മഴയുണ്ടാകുമെന്ന് കാലാവസ്ഥാ വകുപ്പിന്റെ പ്രവചനം. ഒറ്റപ്പെട്ട സ്ഥലങ്ങളിൽ വേനൽ മഴ ലഭിക്കും. അടുത്താഴ്ചയോടെ ബംഗാൾ ഉൾക്കടലിൽ ന്യൂനമർദം രൂപപ്പെടും. അതോടെ സംസ്ഥാനത്തൊട്ടാകെ വേനൽ മഴ ലഭിക്കാൻ സാധ്യതയുണ്ടെന്നും കാലാവസ്ഥാ വകുപ്പ് പ്രവചിക്കുന്നു. അന്തരീക്ഷ ആർദ്രത കൂടുതലുള്ള പ്രദേശങ്ങളിൽ മഴ ലഭിക്കും. തെക്കൻ കേരളത്തിലാണ് മഴയ്ക്ക് കൂടുതൽ സാധ്യത. കൊല്ലം, പത്തനംതിട്ട, ആലപ്പുഴ, എറണാകുളം ജില്ലകളിൽ മഴയുണ്ടാകുമെന്നാണ് പ്രവചനം. കണ്ണൂർ, വയനാട് വനമേഖലകളിലും മഴ ലഭിച്ചേക്കും….