ബെംഗളൂരു: ബെംഗളൂരുവിനെ നടുക്കി കൊലപാതക പരമ്പര. ടാക്‌സി ഡ്രൈവര്‍ ഭാര്യയെയും ഭാര്യയുടെ മാതാവ് അടക്കം ആറ് ബന്ധുക്കളെയും കൊലപ്പെടുത്തി. ദാമ്പത്യ പ്രശ്‌നത്തില്‍ ഭാര്യവീട്ടുകാര്‍ ഇടപെട്ടതാണ് കൊലപാതകത്തിലേക്ക് നയിച്ചതെന്നാണ് പ്രതിയുടെ മൊഴി.
ബെംഗളൂരുവിലെ രാജാജി നഗറില്‍ സ്ഥിര താമസക്കാരനായ ഇന്ദുശേഖറാണ് ഏഴ് പേരെ കൊലപ്പെടുത്തിയത്. ഇന്ദുശേഖറിന്റെ ഭാര്യ സുനിത, ഭാര്യാമാതാവ് രൂപവതി, സുനിതയുടെ സഹോദരങ്ങളായ ശിവകുമാര്‍, ശങ്കര്‍, ഇവരുടെ ഭാര്യമാരായ ദിവ്യ, നളിനി, ഏഴ് വയസുകാരന്‍ പുനീത് എന്നിവരാണ് കൊല്ലപ്പെട്ടത്.
മുപ്പത് വര്‍ഷം മുന്‍പ് വിവാഹിതരായ സുനിതയും ഇന്ദുശേഖറും തമ്മില്‍ സ്ഥിരമായി പ്രശ്‌നങ്ങളുണ്ടായിരുന്നു. ഇതില്‍ ഭാര്യവീട്ടുകാര്‍ ഇടപെട്ടതാണ് പകയ്ക്ക് കാരണമെന്ന് പ്രതി പറയുന്നു. ആട്ടുകല്ലിന്റെ കുഴ കൊണ്ട് തലയ്ക്കടിച്ചാണ് ആദ്യം സുനിതയെ ഇയാള്‍ കൊലപ്പെടുത്തിയത്. പിന്നീട് ഭാര്യ വീട്ടുകാരെ ഓരോരുത്തരെയായി വീട്ടിലേക്ക് വിളിച്ചു വരുത്തി തലയ്ക്കടിച്ച് കൊലപ്പെടുത്തി. മൃതദേഹ ഭാഗങ്ങള്‍ സ്വന്തം ടാക്‌സിയിലാക്കി നഗരത്തിന്റെ പല ഭാഗങ്ങളില്‍ ഉപേക്ഷിച്ചുവെന്നാണ് പ്രതിയുടെ മൊഴി.
കൊല്ലപ്പെട്ട നളിനിയെ കാണാനില്ലെന്ന് ചൂണ്ടിക്കാട്ടി കുടുംബം പരാതി നല്‍കിയതോടെയാണ് അന്വേഷണം ഇന്ദുശേഖറിലേക്കെത്തിയത്. ഇയാളുടെ മൊഴിയില്‍ സംശയം തോന്നി കൂടുതല്‍ ചോദ്യം ചെയ്തതോടെയാണ് നടുക്കുന്ന കൊലപാതക വിവരങ്ങള്‍ പൊലീസിന് ലഭിച്ചത്. കൊല്ലപ്പെട്ട ഏഴ് വയസുകാരന്‍ പുനീതിന്റെ മൃതദേഹം നന്ദി ഹില്ലില്‍ കണ്ടെത്തിയെങ്കിലും മറ്റുള്ളവരുടെ മൃതദേഹം കണ്ടെത്താനുള്ള തിരച്ചില്‍ തുടരുകയാണ്. കൊലപാതകത്തിനായി പ്രതിക്ക് ആരുടെയെങ്കിലും സഹായം ലഭിച്ചിട്ടുണ്ടോ എന്നും പൊലിസ് അന്വേഷിക്കുന്നുണ്ട്.
Read More
ഇനി ‘പച്ച ടാക്‌സി’; ജിദ്ദ വിമാനത്താവളത്തിലെ ടാക്‌സിയുടെ നിറം പരിഷ്കരിച്ചു
ഫോണില്‍ ആക്ടീവ് സിം കാര്‍ഡില്ലേ? വാട്ട്‌സ്ആപ്പ് അക്കൗണ്ട് ഉപയോഗിക്കാനാകില്ല; കര്‍ശന നിര്‍ദേശവുമായി കേന്ദ്രം
ഓപ്പറേഷന്‍ റൈഡല്‍; കൊല്ലത്ത് മദ്യപിച്ച് വാഹനമോടിച്ച 17 ഡ്രൈവര്‍മാര്‍ പിടിയില്‍
കെഎസ്ആര്‍ടിസി ഡ്രൈവര്‍മാരെ കൊണ്ട് തദ്ദേശ സ്ഥാപനങ്ങള്‍ക്കുവേണ്ടി മാലിന്യ ശേഖരണം നടത്താന്‍ എംഡി
