വിമാനത്താവളത്തിലെ കോവിഡ് പരിശോധന നിരക്കും കുറച്ചു

തിരുവനന്തപുരം: വിമാനത്താവളത്തിലെ കോവിഡ് പരിശോധന നിരക്ക് കുറച്ചു. റ്റാറ്റ എംഡി ചെക്ക് എക്സ്പ്രസ് പിസിആർ പരിശോധനയ്ക്ക് 975 രൂപയാക്കി കുറച്ചു. തെർമോ അക്യുലോ പരിശോധനയ്ക്ക് 1,200 രൂപയാക്കി.

കോവിഡ് പരിശോധനകള്‍ക്കും പിപിഇ കിറ്റ്, എന്‍ 95 മാസ്‌ക് തുടങ്ങിയ സുരക്ഷാ സാമഗ്രികള്‍ക്കും നിരക്ക് കുറച്ചിരുന്നു. ആര്‍ടിപിസിആര്‍ 300 രൂപ, ആന്‍റിജന്‍ 100 രൂപ, എക്‌സ്‌പെര്‍ട്ട് നാറ്റ് 2,350 രൂപ, ട്രൂനാറ്റ് 1225 രൂപ, ആര്‍ടി ലാമ്പ് 1025 രൂപ എന്നിങ്ങനെയാണ് നിരക്ക് നിശ്ചയിച്ചിരിക്കുന്നത്. എല്ലാ ചാര്‍ജുകളും ഉള്‍പ്പെടെയുള്ള നിരക്കാണിത്.

പിപിഇ കിറ്റ് ഒരു യൂണിറ്റിന് എക്‌സ്എൽ സൈസിന് 154 രൂപയും ഡബിള്‍ എക്‌സ്എല്‍ സൈസിന് 156 രൂപയുമാണ് ഏറ്റവും കുറഞ്ഞ തുക. എക്‌സ്എല്‍., ഡബിള്‍ എക്‌സ്എൽ സൈസിന് ഉയര്‍ന്ന തുക 175 രൂപയാണ്. എന്‍ 95 മാസ്‌ക് ഒരെണ്ണത്തിന് കുറഞ്ഞ തുക 5.50 രൂപയും ഉയര്‍ന്ന തുക 15 രൂപയുമാണ്. അമിത ചാര്‍ജ് ഈടാക്കുന്നവര്‍ക്കെതിരെ കര്‍ശന നടപടി സ്വീകരിക്കുന്നതാണെന്ന് ആരോഗ്യമന്ത്രി വ്യക്തമാക്കി.