ഇറാനെ വീണ്ടും ആക്രമിക്കാൻ ഒരുങ്ങുകയാണോ യുഎസും ഇസ്രയേലും? ആഗോള സമ്പദ്‍രംഗം ഇറാനിലേക്കും ഇസ്രയേലിലേക്കും യുഎസിലേക്കും ഒരുപോലെ കണ്ണുംനട്ടിരിക്കുകയാണ്. ഇനിയൊരു യുദ്ധം ഉടനുണ്ടാകുമോയെന്ന് പ്രസിഡന്റ് ട്രംപിനും ഇസ്രയേൽ പ്രധാനമന്ത്രി നെതന്യാഹുവിനും മാത്രമേ അറിയൂ എന്ന് ഇസ്രയേലിലെ യുഎസ് അംബാസഡർ മൈക്ക് ഹക്കബീ പറഞ്ഞു.
എണ്ണവിലയിൽ കയറ്റിറക്കം
ഇസ്രയേലിലെ തിരഞ്ഞെടുപ്പിൽ ആർക്കും കേവല ഭൂരിപക്ഷം ഉറപ്പിക്കാനാവാത്തത് രാജ്യാന്തര എണ്ണവിലയിൽ ചാഞ്ചാട്ടം സൃഷ്ടിച്ചിട്ടുണ്ട്. സൗദി അറേബ്യയ്ക്കു നേരെ ഹൂതികൾ നടത്തുന്ന ആക്രമണത്തിന് ശമനമില്ലാത്തത് എണ്ണവിലയെ മേലോട്ട് നയിച്ചേക്കാവുന്ന ഘടകമാണ്. എന്നാൽ, ഇറാനും യുഎസും തമ്മിലെ സമാധാന ചർച്ചയ്ക്ക് വഴി വീണ്ടും തെളിയുന്നത് എണ്ണവിലയെ വലിയൊരു കുതിപ്പിൽ നിന്ന് അകറ്റി നിർത്തുന്നു.
സമാധാനം കൈവിടില്ലെന്ന് ഇറാൻ
ഇറാൻ സൈനികർ നിർഭയം, സുശക്തം പോരാടുകയാണെന്നും ഏത് ഭീഷണി നേരിടാനും രാജ്യം സജ്ജമാണെന്നും ഒരു ഇറാനിയൻ മാധ്യമത്തോട് പറഞ്ഞ ഇറാൻ വിദേശകാര്യ മന്ത്രി അബ്ബാസ് അരഗ്ചി, ഹോർമുസ് കടലിടുക്ക് തുറക്കുന്നതിനു ഉൾപ്പെടെ ഇറാൻ സജ്ജമാണെന്നും വ്യക്തമാക്കി. യുദ്ധമെങ്കിൽ യുദ്ധമെന്ന് പറഞ്ഞ അരഗ്ചി, സമാധാനത്തിനുള്ള ഒരു ശ്രമവും പാഴാക്കില്ലെന്നും പറഞ്ഞു.
വാൻസിന്റെ കത്ത്, ഉദ്ദേശ്യമെന്ത്?
ഇതിനിടെ യുഎസ് വൈസ് പ്രസിഡന്റ് ജെ.ഡി. വാൻസ്, ചർച്ചയ്ക്കുള്ള സാധ്യത തേടി ഇറാനിയൻ ദേശീയ സുരക്ഷാ നേതാവ് മൊഹ്സിൻ റെസായിക്ക് കത്ത് അയച്ചത് വലിയ ചർച്ചയായി. എന്നാൽ, ഇതു സമാധാന ചർച്ച തേടിയുള്ള കത്ത് അല്ലെന്ന് ട്രംപ് പറഞ്ഞു. ഇറാൻ കടുത്ത മരുന്നുക്ഷാമം നേരിടുന്നുണ്ട്. അവർക്ക് സഹായം വേണം. അസുഖ ബാധിതരായവർക്ക് മരുന്ന് എത്തിക്കാനാണ് ശ്രമമെന്നും ട്രംപ് പറഞ്ഞു.
ക്രൂഡോയിൽ താഴ്ന്നു, പലിശയിൽ തൊട്ടില്ല
നിലവിൽ ബ്രെന്റ് ക്രൂഡ് വില ബാരലിന് 0.69% താഴ്ന്ന് 114.5 ഡോളറായിട്ടുണ്ട്. അമേരിക്കൻ (ഡബ്ല്യുടിഐ) ക്രൂഡ് വില 0.69% നഷ്ടവുമായി 102.1 ഡോളറിലുമെത്തി. ഇതിനിടെ, യുഎസ് കേന്ദ്രബാങ്കായ ഫെഡറൽ റിസർവ് പ്രതീക്ഷിച്ചതുപോലെ അടിസ്ഥാന പലിശനിരക്ക് നിലനിർത്തിയതും ആഗോളതലത്തിൽ ഓഹരി വിപണികൾക്ക് ആശ്വാസമാണ്. എന്നാൽ, ഈ വർഷം ഒരുതവണ കൂടി പലിശനിരക്ക് കൂട്ടുമെന്ന സൂചന ഫെഡ് നൽകിയിട്ടുണ്ട്. ഡിസംബറിലെ യോഗത്തിൽ പലിശനിരക്ക് ഉയർത്തിയേക്കും.
സ്വർണം കരകയറുമോ?
യുഎസ് ഫെഡ് പലിശയിൽ മാറ്റംവരുത്താതെ ഇന്നലെ പണനയം പ്രഖ്യാപിച്ചത് സ്വർണത്തിന് കരകയറാനുള്ള വഴി തുറക്കുകയാണ്. രാജ്യാന്തരവില ഒരുഘട്ടത്തിൽ ഔൺസിന് 4030 ഡോളർ വരെ താഴ്ന്നെങ്കിലും ഇപ്പോൾ 4054 ഡോളറിൽ എത്തി.
വിപണിക്ക് ആൽഫബെറ്റ് ഷോക്ക്
യുഎസ് ഓഹരി വിപണികൾ ഇന്നലെ പോസിറ്റീവ് ആയിരുന്നു. എസ് ആൻഡ് പി 500 സൂചിക 0.28%, നാസ്ഡാക് 0.27%, ഡൗ ജോൺസ് 0.19% എന്നിങ്ങനെ ഉയർന്നു. എന്നാൽ, ഗൂഗിളിന്റെ മാതൃകമ്പനിയായ ആൽഫബെറ്റ് ആശാവഹമല്ലാത്ത സെപ്റ്റംബർപാദ പ്രവർത്തനഫലം പുറത്തുവിട്ടത് ഫ്യൂച്ചേഴ്സ് വിപണിയിൽ നാസ്ഡാക്കിനെ 1.2% വീഴ്ത്തി. ആൽഫബെറ്റ് 10% ഇടിഞ്ഞു.
പോസിറ്റീവാകാൻ ഇന്ത്യ
ഏഷ്യൻ വിപണികൾ പൊതുവേ പോസിറ്റീവ് ട്രാക്കിലാണ്. ഇന്നലെ വിപണിയിൽ അരങ്ങേറിയ ജിയോ പ്ലാറ്റ്ഫോംസ് ഓഹരി, നിക്ഷേപകർക്ക് മികച്ച ലിസ്റ്റിങ് ദിന നേട്ടം സമ്മാനിച്ചെങ്കിലും സെൻസെക്സും നിഫ്റ്റിയും ചുവന്നാണ് വ്യാപാരം അവസാനിപ്പിച്ചത്. ഇന്ത്യൻ വിപണി ഇന്ന് നേട്ടത്തിലേറുമെന്നാണ് പ്രതീക്ഷകൾ. ഗിഫ്റ്റ് നിഫ്റ്റി രാവിലെ 59 പോയിന്റ് ഉയർന്നുവെന്നത് നേട്ടപ്രതീക്ഷയാണ് നൽകുന്നത്. വിദേശ നിക്ഷേപകർ ഇന്നലെയും ഇന്ത്യൻ ഓഹരികൾ വാങ്ങുകയാണ് ചെയ്തതെന്നതും വലിയ പ്രതീക്ഷ നൽകുന്നു.
Read More
ട്രംപിന്റെ ‘തിരഞ്ഞെടുപ്പ്’ തന്ത്രം പൊളിക്കാൻ ഇറാൻ; ‘ലോകം’ ഇന്ത്യയിലേക്ക്, 110ലേക്ക് എണ്ണ, പലിശപ്പേടിയിൽ ഇടിഞ്ഞ് സ്വർണം, ഓഹരിയും വീഴുന്നു
വീണ്ടും കപ്പൽയുദ്ധം, സംഘർഷം രൂക്ഷം; കത്തിക്കയറി എണ്ണവില, ഇറാനുമായി ചർച്ചയില്ലെന്ന് ട്രംപ്, വിഴുങ്ങാൻ ‘പലിശ ഭൂതം’ വരുന്നു
സമാധാനത്തിനായി ഇനി പന്ത് തട്ടാം: സമാധാന കരാറിൽ ധാരണയായ ഘട്ടത്തിൽ അമേരിക്കയിലെത്തി ഇറാനിയൻ ഫുട്ബോൾ ടീം
സൗദി മന്ത്രി ഇറാനിൽ; ഈജിപ്തും യുദ്ധഭൂമിയിലേക്ക്, ഹൂതികൾ അടങ്ങും? താഴ്ന്ന് എണ്ണവില, ‘ഭീമൻ നികുതി’ വെട്ടിക്കുറയ്ക്കാൻ ഇന്ത്യ
