മയ്യനാട് (കൊല്ലം)∙ ജീവിക്കാൻ കഷ്ടപ്പെടുന്നതിനിടെ തട്ടിപ്പിനിരയായതാണ്, കരഞ്ഞുതളർന്നതാണ്. പക്ഷേ, ഒരു തട്ടിപ്പുകാരനും കവർന്നെടുക്കാനായില്ല അമ്പിളിയുടെ മനസ്സിന്റെ വെളിച്ചം. ലോട്ടറി വിൽപനക്കാരിയായ മയ്യനാട് ധവളക്കുഴിയിൽ ദ്വാരക വീട്ടിൽ അമ്പിളിയെ കഴിഞ്ഞയാഴ്ചയാണ് അജ്ഞാതൻ ടിക്കറ്റിൽ കൃത്രിമം കാട്ടി കബളിപ്പിച്ചതും 4000 രൂപ തട്ടിയെടുത്തതും. ആ കണ്ണീർതോരും മുൻപേ അമ്പിളിക്ക് ഒരു സ്വർണത്താലി കളഞ്ഞുകിട്ടി. അക്കാര്യം സമീപത്തെ കടകളിൽ അറിയിച്ച അമ്പിളി ഉടമയെത്തിയാൽ തന്നെ വിളിക്കാൻ ഫോൺ നമ്പറും നൽകി. കൊട്ടിയത്തെ ജ്വല്ലറി ഉടമയുടെ സുഹൃത്തിന്റെ താലിയാണു കാറിലേക്കു കയറുമ്പോൾ നഷ്ടപ്പെട്ടത്. ഉടമയുടെ ബന്ധുവെത്തി താലി കൈപ്പറ്റി.
അമ്പിളിയുടെ കൈയിൽനിന്ന് ഏതാനും ദിവസം മുൻപാണ് അപരിചിതനായ യുവാവ് ലോട്ടറി ടിക്കറ്റിലെ നമ്പർ തിരുത്തി 4000 രൂപ കബളിപ്പിച്ചത്. കാരിക്കുഴിക്കും താന്നി മുക്കിനും മധ്യേ വലിയതോട്ടത്തു കാവ് ക്ഷേത്രത്തിനു സമീപത്തു വച്ചാണ് യുവാവ് തന്ത്രപരമായി അമ്പിളിയെ കബളിപ്പിച്ചത്. തനിക്ക് സമ്മാനം ലഭിച്ച ലോട്ടറി ഉണ്ടെന്നും ഇത് എടുത്ത ശേഷം ബാക്കി പണവും ലോട്ടറിയും നൽകണമെന്ന് ആവശ്യപ്പെട്ടു. തുടർന്ന് നമ്പർ പരിശോധിച്ച ശേഷം 4000 രൂപ നൽകുകയും അമ്പിളിയുടെ കയ്യിൽ നിന്നു 100 രൂപയുടെ ലോട്ടറി എടുക്കുകയും ചെയ്തു. വൈകുന്നേരത്തോടെ ലോട്ടറി ടിക്കറ്റ് മാറാനായി കടയിൽ എത്തിയപ്പോഴാണ് ചതി മനസ്സിലായത്.
0 എന്ന നമ്പറുകൾ തിരുത്തി 9 ആക്കിയായിരുന്നു തട്ടിപ്പ് നടത്തിയത്. കിടപ്പു രോഗിയായ ഭർത്താവിന്റെ ചികിത്സയ്ക്കും ഉപജീവനത്തിനും വേണ്ടിയാണ് വയോധികയായ അമ്പിളി കിലോമീറ്റർ കാൽനടയായി നടന്ന് കച്ചവടം ചെയ്യുന്നത്. ‘ചായപോലും കുടിക്കാതെ ഉണ്ടാക്കിയ പണമാണ്. മകന്റെ പ്രായമേ ഉള്ളൂ. ഇങ്ങനെ ചെയ്യുമെന്ന് കരുതിയില്ല’– അമ്പിളി പറയുന്നു. അമ്പിളിയുടെ പരാതിയിൽ ഇരവിപുരം പൊലീസ് കേസെടുത്തു അന്വേഷണം ആരംഭിച്ചിട്ടുണ്ട്.
Read More
പിഎസ്സി പരീക്ഷയിൽ തട്ടിപ്പു നടത്തിയ കേസ്: പ്രതിക്ക് 3 വർഷം തടവും പിഴയും
സർക്കാർ ലോട്ടറി ചൂതാട്ടം അല്ല, ലോട്ടറി ജിഎസ്ടി വർധനവിൽ നിന്ന് കേന്ദ്രം പിന്തിരിയണം; എം.വി ജയരാജൻ
കളക്ടർ ഇടപെട്ടു; പ്രതിഷേധം അവസാനിപ്പിച്ച് നാട്ടുകാർ; അമ്പിളിയുടെ മൃതദേഹം ഉടൻ സംസ്കരിക്കും
‘GST ഉയര്ന്നാലും ലോട്ടറി ടിക്കറ്റ് വില കൂട്ടില്ല, താഴെത്തട്ടിലെ തൊഴിലാളികളുടെ കമ്മീഷന് കുറയ്ക്കില്ല’: ഉറപ്പുകളുമായി ധനമന്ത്രി
