വാഷിങ്ടൻ ∙മറ്റു രാജ്യങ്ങളിലെ ഡേറ്റ സെന്ററുകളിൽനിന്ന് ചൈന എഐ ചിപ്പുകൾ വാങ്ങുന്നതു തടയാൻ യുഎസ് വാണിജ്യവകുപ്പ് പുതിയ കയറ്റുമതി നിയന്ത്രണങ്ങൾ പ്രഖ്യാപിച്ചു. എൻവിഡിയയുടെ ചിപ്പുകൾ മൂന്നാം രാജ്യത്തുനിന്നു ചൈന വാങ്ങിയ സാഹചര്യത്തിലാണിത്. വ്യാപാരനിയന്ത്രണങ്ങളെ ചൈന അപലപിച്ചു. പുതിയ ചട്ടമനുസരിച്ച് ഇന്തൊനീഷ്യ, മലേഷ്യ, സിംഗപ്പൂർ, തായ്ലൻഡ്, ബ്രസീൽ തുടങ്ങിയ രാജ്യങ്ങളിൽ എഐ ചിപ്പുകളുടെ വ്യാപാരത്തിനു പ്രത്യേക ലൈസൻസ് വേണം.
സിംഗപ്പൂർ ആസ്ഥാനമായ മെഗാസ്പീഡിൽനിന്നാണു ചൈന എൻവിഡിയയുടെ എഐ ചിപ്പുകൾ വാങ്ങിയത്. ചൈനീസ് ചാരവനിതയെന്നു യുഎസ് ഏജൻസികൾ സംശയിക്കുന്ന ആലീസ് ഹുവാങ് ഈ കമ്പനിയുടെ എക്സിക്യൂട്ടീവായിരുന്നു. ഇവരുമായുള്ള അടുപ്പത്തിന്റെ പേരിലാണ് എൻവിഡിയയുടെ സിഇഒ സ്ഥാനം ജെൻസെൻ ഹുവാങ്ങിനു രാജിവയ്ക്കേണ്ടിവന്നത്. മലേഷ്യയിലെ ഡേറ്റ സെന്റർ കമ്പനികളിൽനിന്നും ചൈനീസ് കമ്പനികൾ എഐ ചിപ്പുകൾ വാങ്ങിയതായി കണ്ടെത്തിയിട്ടുണ്ട്.
ദേശസുരക്ഷാകാര്യങ്ങൾ കൂടി പരിഗണിച്ചുള്ള ചിപ്പു കയറ്റുമതി ഉറപ്പാക്കാൻ പുതിയ ബോർഡ് കമ്മിറ്റിക്ക് എൻവിഡിയ രൂപംനൽകി. ചൈനയ്ക്കെതിരെ യുഎസിന്റെ കയറ്റുമതി നിയന്ത്രണങ്ങൾ പാലിക്കുന്നുണ്ടെന്നു ഉറപ്പുവരുത്താൻ നിയുക്തമായ ഈ സമിതിയിൽ ഡയറക്ടർ ബോർഡിലെ 3 പേരും അംഗങ്ങളാണ്.
അതേസമയം, എൻവിഡിയ മുൻ സിഇഒ ജെൻസെൻ ഹുവാങ് യുഎസ് കോൺഗ്രസിലെ വിവിധ സമിതികൾക്കു മുൻപാകെ തെളിവെടുപ്പിനു ഡിസംബർ 1ന് ഹാജരാകും. ചൈനയിലേക്കുള്ള ചിപ്പ് കയറ്റുമതി സംബന്ധിച്ചുള്ള ചോദ്യങ്ങൾക്കാണു മറുപടി നൽകേണ്ടത്.









