ഹ്യുണ്ടായിയുടെ ഏറ്റവും പുതിയ എസ്യുവി മോഡലായ ബയോൺ പ്രദർശിപ്പിച്ചു. ഈ മാസം 26ന് വാഹനം ഇന്ത്യൻ വിപണിയിലെത്തും. വാഹനത്തിന്റെ ബുക്കിങ് ഇതിനോടകം തന്നെ ആരംഭിച്ചു കഴിഞ്ഞു. ഹ്യുണ്ടായ് ഡീലർഷിപ്പുകൾ വഴിയോ ഔദ്യോഗിക വെബ്‌സൈറ്റ് വഴിയോ 11,000 രൂപ നൽകി വാഹനം ഇപ്പോൾ ബുക്ക് ചെയ്യാവുന്നതാണ്. വാഹനത്തിന്റെ ഡിസൈനും സവിശേഷതകളും ഹ്യുണ്ടായി പുറത്തുവിട്ടിട്ടുണ്ട്.
ഹ്യുണ്ടായിയുടെ ആർട്ട് ഓഫ് സ്റ്റീൽ ഡിസൈൻ ലാംഗ്വേജിൽ ഒരുങ്ങിയിട്ടുള്ള വാഹനമാണ് ബയോൺ. വെന്യുവിനും ക്രെറ്റയ്ക്കും ഇടയിലുള്ള ശ്രേണിയിലാകും പുതിയ എസ്യുവി സ്ഥാനം പിടിക്കുക. സാങ്കേതികവിദ്യയ്ക്ക് വലിയ പ്രാധാന്യം നൽകിക്കൊണ്ട് ഇതിനെ ഒരു “ഇന്റലിജന്റ് യൂട്ടിലിറ്റി വെഹിക്കിൾ” ആയാണ് ഹ്യുണ്ടായ് അവതരിപ്പിക്കുന്നത്. സെപ്റ്റംബറിൽ എക്കാലത്തെയും ഉയർന്ന പ്രതിമാസ വിൽപ്പന രേഖപ്പെടുത്തിയ ഹ്യുണ്ടായ് ഇന്ത്യ, ഈ ഉത്സവ സീസണിൽ ബയോൺ അവതരിപ്പിച്ചുകൊണ്ട് ആ മുന്നേറ്റം തുടരാനാണ് ലക്ഷ്യമിടുന്നത്.
ഗ്രേ-ബ്ലാക്ക് ഡ്യുവൽ-ടോൺ തീമിലുള്ള ക്യാബിനാണ് ബയോണിനുള്ളത്. പനോരമിക് പാനലിൽ 12.3-ഇഞ്ച് വരുന്ന ഡിസ്‌പ്ലേകൾ ഇൻഫോടെയ്ൻമെന്റ്, ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിവയുടെ പ്രവർത്തനങ്ങൾ നിർവഹിക്കുന്നു. ഇതിന്റെ രൂപകൽപ്പന ബ്രസീലിൽ അവതരിപ്പിച്ച പുതിയ തലമുറ i20-യുമായി ഏറെ സാമ്യമുള്ളതാണ്.’ പെർപ്ലെക്‌സിറ്റി’ നൽകുന്ന ബുദ്ധിശക്തിയും ‘സൗണ്ട്‌ഹൗണ്ട് എഐ’-യുടെ വോയ്‌സ് സാങ്കേതികവിദ്യയും സംയോജിപ്പിച്ചുകൊണ്ട്, ഹ്യുണ്ടായ് മോട്ടോർ ഇന്ത്യയുടെ ആദ്യത്തെ ജനറേറ്റീവ് എഐ വോയ്‌സ് അസിസ്റ്റന്റുമായാണ് ‘ബയോൺ’ (Bayon) എത്തുന്നത്.
115 PS കരുത്തും 144 Nm ടോർക്കും ഉൽപ്പാദിപ്പിക്കുന്ന 1.5 ലിറ്റർ, 4-സിലിണ്ടർ MPi പെട്രോൾ എൻജിൻ ആകും വാഹനത്തിന് കരുത്ത് പകരുകയെന്ന് ഹ്യുണ്ടായ് സ്ഥിരീകരിച്ചിട്ടുണ്ട്. ക്രെറ്റയിൽ ഉപയോഗിച്ചിരിക്കുന്ന അതേ എൻജിൻ തന്നെയാണ് ഇതിലും നൽകിയിരിക്കുന്നത്. 6-സ്പീഡ് മാനുവൽ അല്ലെങ്കിൽ IVT ഓട്ടോമാറ്റിക് ട്രാൻസ്മിഷൻ ഓപ്ഷനുകൾ ഉപഭോക്താക്കൾക്ക് ലഭ്യമാകും. എക്സ്-ഷോറൂം വില 9 ലക്ഷം രൂപ മുതൽ 14 ലക്ഷം രൂപ വരെ പ്രതീക്ഷിക്കുന്ന ബയോൺ, മിഡ്-സൈസ് എസ്യുവി വിപണിയിൽ മാരുതി വിക്ടോറിസ് അടക്കമുള്ള മോഡലുകളോടാണ് നേരിട്ട് മത്സരിക്കുന്നത്.
