തൃശൂരിലെ ലോഡ്ജിൽനിന്ന് യുവതിയെ തട്ടിക്കൊണ്ടുപോയി കൂട്ടബലാത്സംഗത്തിന് ഇരയാക്കി; ക്വട്ടേഷൻ നൽകിയത് സുഹൃത്തിന്റെ ഭാര്യ

തൃശൂർ ∙ ആൺസുഹൃത്തുമൊത്തു തൃശൂരിലെ സ്വകാര്യ ലോഡ്ജിൽ മ‍ുറിയെടുത്ത തിരുപ്പൂർ സ്വദേശിയായ യുവതിയെ പൊലീസ് ചമഞ്ഞു ക്വട്ടേഷൻ സംഘം തട്ടിക്കൊണ്ടുപോയി കൂട്ടബലാത്സംഗത്തിനിരയാക്കി. ഒപ്പമുണ്ടായിരുന്ന ആൺസുഹൃത്തിനെ കയ്യും കാലും തല്ലിയൊടിച്ച് തമിഴ്നാട്ടിലെ ആശുപത്രിയിൽ തള്ളി. ആൺസുഹൃത്തിന്റെ ഭാര്യ നൽകിയ ക്വട്ടേഷൻ ഏറ്റെടുത്ത അഞ്ചംഗ ഗുണ്ടാസംഘമാണു കൃത്യത്തിനു പിന്നിലെന്നു കണ്ടതോടെ 5 പേരെയും വിവിധയിടങ്ങളിൽ നിന്നായി അറസ്റ്റു ചെയ്തു.

ഏതാനും ദിവസം മുൻപാണു സംഭവം. തിരുപ്പൂർ സ്വദേശിയായ യുവാവും യുവതിയും കൂടി തൃശൂരിലെത്തി കെഎസ്ആർടിസി ബസ് സ്റ്റാൻഡിനു സമീപത്തെ ലോജ്ഡിൽ മുറിയെടുത്തു. ഇതിനു ശേഷം നടന്നതിങ്ങനെ: യുവാവിന്റെ ഭാര്യ ഇയാളുടെ ഫോൺ ലൊക്കേഷൻ പിന്തുടർന്ന ശേഷം ഒരു ക്വട്ടേഷൻ സംഘത്തിനു വിവരങ്ങൾ കൈമാറി. 5 പേരടങ്ങുന്ന സംഘം പൊലീസ് ചമഞ്ഞു തൃശൂരിലെത്തിയ ശേഷം ലോജ്ഡിൽ ഇവരുടെ മുറിക്കുള്ളിൽ അതിക്രമിച്ചു കയറി. യുവാവിന്റെയും യുവതിയുടെയും കയ്യും കാലും തുണികൊണ്ടു കെട്ടിയ ശേഷം വായിലും തുണി തിരുകി കാറിൽ കയറ്റി.

തിരുപ്പൂരിലേക്കുള്ള മടക്കയാത്രയിലുടനീളം യുവാവിനെ ക്രൂരമായി മർദിച്ചു. യുവാവിന്റെ കയ്യും കാലും പലയിടത്തായി ഒടിഞ്ഞ നിലയിലാണ്. ഇയാളെ തിരുപ്പൂരിനു സമീപമുള്ള ആശുപത്രിക്കു മുന്നിൽ തള്ളിയ ശേഷം 5 അംഗ സംഘത്തിലെ 2 പേർ ചേർന്നു യുവതിയെ മറ്റൊരു കാറിലേക്കു മാറ്റി. ഈ രണ്ടു പേർ ചേർന്നാണു യുവതിയെ പീഡനത്തിനിരയാക്കിയത്. പരുക്കേറ്റ യുവതിയിൽ നിന്നു ലഭിച്ച വിവരങ്ങൾ പ്രകാരം തമിഴ്നാട് പൊലീസ് കേസെടുത്തു തൃശൂർ സിറ്റി പൊലീസിനു കൈമാറി. സിറ്റി പൊലീസ് നടത്തിയ ഊർജിത അന്വേഷണത്തിൽ പ്രതികളിലൊരാളെ നെടുമ്പാശേരി എയർപോർട്ടിനു സമീപത്തു നിന്നു കണ്ടെത്താൻ കഴിഞ്ഞതു നിർണായകമായി. ഇയാളെ ചോദ്യം ചെയ്തപ്പോൾ ലഭിച്ച വിവരങ്ങളുടെ അടിസ്ഥാനത്തിൽ 3 പേരെ തിരുപ്പൂരിൽ നിന്നും ഒരാളെ പഴനിയിൽ നിന്നുമാണു പിടികൂടിയത്. പ്രതികളുടെ പേരുവിവരങ്ങളടക്കം വിശദാംശങ്ങൾ പൊലീസ് പിന്നീടു പുറത്തുവിടും.