സാക്ഷികൾക്ക് പണം കൈമാറിയതിന്റെ തെളിവുകൾ; അന്വേഷണം ദിലീപിന്റെ സഹോദരി ഭർത്താവിലേക്ക്

നടിയെ ആക്രമിച്ച കേസിലെ അന്വേഷണം ദിലീപിന്റെ സഹോദരി ഭർത്താവ് സൂരജിലേക്കും. സൂരജിന്റെ പണമിടപാടുകൾ അന്വേഷിക്കാൻ ക്രൈംബ്രാഞ്ച് തീരുമാനിച്ചു. സാക്ഷികൾക്ക് സൂരജ് പണം കൈമാറിയതിന്റെ തെളിവുകൾ അന്വേഷണ സംഘത്തിന് ലഭിച്ചിട്ടുണ്ട്. ഡിജിറ്റൽ പണമിടപാടുകളുടെ വിവരങ്ങളും അന്വേഷണ സംഘത്തിന് ലഭിച്ചിട്ടുണ്ട്

പ്രമുഖ അഭിഭാഷകൻ വഴിയും സാക്ഷികളെ സ്വാധീനിക്കാൻ ശ്രമിച്ചതായി അന്വേഷണ സംഘത്തിന് സൂചന ലഭിച്ചു. അന്വേഷണ ഉദ്യോഗസ്ഥരെ അപായപ്പെടുത്താൻ ഗൂഢാലോചന നടത്തിയെന്ന കേസിൽ ഫോൺ കോൾ റെക്കോർഡുകൾ അന്വേഷണ സംഘം പരിശോധിക്കും. ദിലീപ് അടക്കം അഞ്ച് പ്രതികളുടെ ഫോൺ വിളിയുടെ വിശദാംശങ്ങളാണ് ശേഖരിക്കുക.

കേസിൽ ദിലീപിനെ രണ്ടാം ദിവസവും ചോദ്യം ചെയ്യുകയാണ്. രാവിലെ തന്നെ കളമശ്ശേരിയിലെ ക്രൈംബ്രാഞ്ച് ഓഫീസിൽ ചോദ്യം ചെയ്യലിനായി ദിലീപ് ഹാജരായിട്ടുണ്ട്. ഇന്നലെ പതിനൊന്ന് മണിക്കൂർ നേരമാണ് ദിലീപിനെ ചോദ്യം ചെയ്തത്.