ന്യൂഡൽഹി ∙ മുഖ്യ തിരഞ്ഞെടുപ്പു കമ്മിഷണർ ഗ്യാനേഷ് കുമാർ ഏകപക്ഷീയമായി തീരുമാനങ്ങളെടുത്തുവെന്നതടക്കം ആരോപണങ്ങൾ തള്ളിയും വോട്ടർപട്ടികയിൽ പുതുതായി പേരുചേർക്കാനുള്ള ‘ഫോം 6’ ഭേദഗതി ചെയ്തിട്ടില്ലെന്ന് ആവർത്തിച്ചും സുപ്രീം കോടതിയിൽ തിരഞ്ഞെടുപ്പു കമ്മിഷന്റെ മറുപടി സത്യവാങ്മൂലം. പ്രതിപക്ഷ നേതാവ് രാഹുൽ ഗാന്ധിയും മറ്റും നൽകിയ ഹർജി ഇന്നു പരിഗണിക്കാനിരിക്കെയാണ് നടപടികളെ കമ്മിഷൻ ന്യായീകരിക്കുന്നത്. ഹർജിയുടെ സാധുത ചോദ്യം ചെയ്തും തള്ളണമെന്ന് ആവശ്യപ്പെട്ടുമാണു കമ്മിഷന്റെ മറുപടി.
2 കമ്മിഷണർമാർ വിയോജിച്ചെങ്കിലും സമഗ്ര വോട്ടർപട്ടിക പരിഷ്കരണവുമായി (എസ്ഐആർ) ബന്ധപ്പെട്ട 3 ഉത്തരവുകളിലെയും തീരുമാനം ഏകകണ്ഠമായിരുന്നുവെന്ന് കമ്മിഷൻ വ്യക്തമാക്കുന്നു. ആഭ്യന്തര ചർച്ചയുടെ ഭാഗമായ ചോദ്യങ്ങൾ, നിർദേശങ്ങൾ, നിരീക്ഷണങ്ങൾ എന്നിവ രേഖപ്പെടുത്താറുണ്ട്. എന്നുകരുതി അവ കമ്മിഷന്റെ തീരുമാനങ്ങളാകില്ലെന്ന് സത്യവാങ്മൂലത്തിൽ പറയുന്നു. അതേസമയം, കമ്മിഷണർമാർ കൂട്ടായാണു തീരുമാനം എടുത്തതെന്നു വ്യക്തമാക്കുന്ന മിനിറ്റ്സോ മറ്റു രേഖകളോ 249 പേജുള്ള സത്യവാങ്മൂലത്തിന്റെ ഭാഗമാക്കിയിട്ടില്ല. ഇവയടക്കം ഹാജരാക്കാൻ നിർദേശിക്കണമെന്നാണ് ഇന്ത്യാസഖ്യത്തിന്റെ ഹർജിയിലുള്ളത്. എസ്ഐആറുമായി ബന്ധപ്പെട്ട 14 തീരുമാനങ്ങളിൽ കമ്മിഷണർമാർ വിയോജിച്ചുവെന്ന വാർത്തയുടെ അടിസ്ഥാനത്തിലാണു ഹർജിയെന്നും ഇതേക്കുറിച്ചു ഹ‍ർജിക്കാർ വസ്തുതാപരിശോധന നടത്തിയിട്ടില്ലെന്നും മറുപടിയിലുണ്ട്. നടപടികളെല്ലാം എസ്ഐആറിന്റെ സുഗമമായ നടത്തിപ്പ് ഉദ്ദേശിച്ചുള്ളതാണ്. തിരഞ്ഞെടുപ്പു കമ്മിഷൻ, മുഖ്യ തിരഞ്ഞെടുപ്പു കമ്മിഷണർ ഗ്യാനേഷ് കുമാർ, കമ്മിഷണർമാരായ സുഖ്‌ബിർ സിങ് സന്ധു, വിവേക് ജോഷി തുടങ്ങിയവർക്കായി ഒന്നിച്ചാണ് ഡപ്യൂട്ടി തിരഞ്ഞെടുപ്പു കമ്മിഷണർ ഭാനു പ്രകാശ് യെത്രു സത്യവാങ്മൂലം നൽകിയിരിക്കുന്നത്.
∙ കഴിഞ്ഞയാഴ്ചയും മാറ്റം
ഫോം 6 നെക്കുറിച്ചുള്ള ആരോപണങ്ങൾക്കിടെ, കഴിഞ്ഞയാഴ്ചയും നടപടികളിൽ മാറ്റം വരുത്തിയെന്നും സത്യവാങ്മൂലം വ്യക്തമാക്കുന്നു. ഫോം 6 ഭേദഗതി ചെയ്തെന്ന വാദം തെറ്റാണെന്ന് ആവർത്തിച്ചുകൊണ്ടാണു കമ്മിഷൻ ഇക്കാര്യം അറിയിച്ചിരിക്കുന്നത്. ഓൺലൈനിൽ ഫോം 6നൊപ്പം ഡിക്ലറേഷൻ ഫോം ചേർത്തിരുന്ന പഴയ രീതി പരിഷ്കരിച്ചു. പകരം, കഴിഞ്ഞ 21ന് ഓൺലൈനിൽ ഫോം 6, എസ്ഐആർ ഡിക്ലറേഷൻ എന്നിങ്ങനെ വേർതിരിച്ചു നൽകിയിട്ടുണ്ട് എന്നാണ് അറിയിച്ചത്. ഇന്ത്യാസഖ്യം നേതാക്കൾ ഹർജി നൽകിയതിനു ശേഷമാണ് ഈ മാറ്റമെന്നതാണു കൗതുകം. ഓൺലൈൻ ഡിക്ലറേഷൻ ഫോം നൽകിയ രീതി ഫോം 6 ഭേദഗതി ചെയ്തെന്ന പ്രതീതി സൃഷ്ടിച്ചിരിക്കാമെന്നും കമ്മിഷൻ അംഗീകരിക്കുന്നു. ഇതു പരിഹരിക്കാനാണു പുതിയ മാറ്റം.
∙ ‘സിഇസിയെ നീക്കാനാകില്ല’
മുഖ്യ തിരഞ്ഞെടുപ്പു കമ്മിഷണറായി ഗ്യാനേഷ് കുമാർ പ്രവർത്തിക്കുന്നത് വിലക്കണമെന്ന ഹർജിക്കാരുടെ ആവശ്യം നിയമപരമല്ലെന്നും നിലനിൽക്കില്ലെന്നുമാണു കമ്മിഷൻ അറിയിച്ചിരിക്കുന്നത്. സുപ്രീം കോടതി ജഡ്ജിമാരുടേതിനു സമാനമായി, പാർലമെന്റിലെ കുറ്റവിചാരണാ നടപടിയിലൂടെ മാത്രമേ സിഇസിയെ നീക്കം ചെയ്യാനാകൂ. വോട്ടിങ് യന്ത്രത്തെക്കുറിച്ചുള്ള ആരോപണങ്ങളും ഹർജികളും സുപ്രീം കോടതി നേരത്തേ തീർപ്പാക്കിയ വിഷയങ്ങളാണെന്നും മറുപടിയിലുണ്ട്.
Read More
സമ്മർദത്തിൽ ഗ്യാനേഷ്, തിരഞ്ഞെടുപ്പ് കമ്മിഷന്റെ മീഡിയ വിഭാഗം മൗനത്തിൽ; പങ്കെടുക്കേണ്ട പരിപാടികളെല്ലാം മാറ്റി
രാജ്യവ്യാപക എസ്ഐആർ ; തിരഞ്ഞെടുപ്പു കമ്മിഷന്റെ വാർത്താസമ്മേളനം നാളെ
രാജ്യസഭാ തിരഞ്ഞെടുപ്പ്: കോടതിവിധിയും മാർഗരേഖയും കോൺഗ്രസിന് അനുകൂലം
ഹരിയാനയിൽ വോട്ട് മോഷണം നടന്നു, ഗ്യാനേഷ് കുമാർ ഉടൻ രാജിവെക്കണം; അമിത് ഷായും മോദിയും ഗൂഢാലോചനയുടെ തലപ്പത്ത്: രാഹുൽ ഗാന്ധി
