കെ.എസ്.ആര്‍.ടി.സിയുടെ മൂന്നാര്‍ ബസ് സ്റ്റേഷന്‍ പരിസരത്ത് സ്ഥാപിച്ച സ്ലീപ്പര്‍ ബസുകള്‍ സഞ്ചാരികള്‍ക്ക് വാടകക്ക് നല്‍കുന്നത് സംബന്ധിച്ച നിരക്കും മാര്‍ഗനിര്‍ദേശങ്ങളും പുറത്തിറക്കി.
സ്ലീപ്പര്‍ ഒന്നിന് ഒരു രാത്രി 100 രൂപ നിരക്കില്‍ വൈകീട്ട് ആറുമണിമുതല്‍ പിറ്റേന്ന് ഉച്ചക്ക് 12വരെ വാടകക്ക് നല്‍കും. വാടകക്ക് തുല്യമായ തുക കരുതല്‍ധനമായി നല്‍കണം. ഒഴിഞ്ഞുപോകുമ്പോള്‍ നാശനഷ്ടങ്ങള്‍ വല്ലതുമുണ്ടെങ്കില്‍ അത് ഈടാക്കിയശേഷം ബാക്കി തുക തിരികെനല്‍കും.
ബസ് ഉപയോഗിക്കുന്നവര്‍ക്ക് നിലവില്‍ മൂന്നാര്‍ ഡിപ്പോയിലെ ടോയ്ലറ്റ് സൗകര്യം ഉപയോഗിക്കാനായി അനുവദിക്കും.
സ്ത്രീകള്‍ക്കും പുരുഷന്മാര്‍ക്കും പ്രത്യേകമായുള്ള ടോയ്ലറ്റുകളാണ് അനുവദിക്കുക.
ഇതിനായി ടോയ്ലറ്റുകള്‍ നവീകരിച്ചുകഴിഞ്ഞു. ഓരോ ഗ്രൂപ്പും മാറുന്നതിന് അനുസരിച്ച്‌ ബസ് വൃത്തിയാക്കി അണു നശീകരണം നടത്തി വേണം അടുത്ത ഗ്രൂപ്പിന് നല്‍കേണ്ടത്. സ്ലീപ്പര്‍ ബസും ടോയ്ലറ്റും വ‍ൃത്തിയാക്കുന്നതിനും താമസിക്കുന്നവര്‍ക്ക് പുറമെ നിന്നും ഭക്ഷണംവാങ്ങി കൊടുക്കുന്നതിനും ലഗേജ് വാഹനത്തില്‍ എടുത്തുവെക്കുന്നതിനുംവേണ്ടി രണ്ട് ജീവനക്കാരെ നിയമിക്കും.
കെ.എസ്.ആര്‍.ടി.സിയുടെ [email protected] മെയില്‍ ഐ.ഡി വഴിയും 9447813851, 04865230201 ഫോണ്‍ നമ്പര്‍ വഴിയും ബുക്ക് ചെയ്യാം. ഇത് കൂടാതെ ബുക്കിങ് ഏജന്‍റുമാരെ 10 ശതമാനം കമീഷന്‍ വ്യവസ്ഥയില്‍ അനുവദിക്കും. സ്ലീപ്പര്‍ ഉപയോഗിക്കുന്ന അതിഥികള്‍ക്ക് ഭക്ഷണം നല്‍കുന്നതിനായി അടുത്തുള്ള ഹോട്ടലുമായി ധാരണയുണ്ടാക്കാനും നടപടി സ്വീകരിച്ചു.
