12 വർഷം കൊണ്ട് പദ്ധതി പൂർണമായും പൂർത്തിയാക്കുമെന്ന് ഉത്തരവിൽ പറയുന്നു.
തിരുവനന്തപുരം: തിരുവനന്തപുരം – കാസർകോട് അതിവേഗ പാതയായ റീജിയണൽ റാപിഡ് ട്രാൻസിറ്റ് സിസ്റ്റം(ആർആർടിഎസ്) പദ്ധതിയുമായി സംസ്ഥാന സർക്കാർ മുന്നോട്ട്. പദ്ധതിയുടെ നടപടികളുമായി ബന്ധപ്പെട്ട കാര്യങ്ങൾ വ്യക്തമാക്കിക്കൊണ്ട് സർക്കാർ ഉത്തരവിറക്കി. ഗതാഗത വകുപ്പാണ് ഇത് സംബന്ധിച്ച മാർഗനിർദേശം കണക്കെയുള്ള ഉത്തരവിറക്കിയത്.തിരുവനന്തപുരം മുതൽ കാസർകോട് വരെ 583 കിലോ മീറ്ററാണ് ആർആർടിഎസിന്റെ ദീർഘം. ഇതിൽ തിരുവനന്തപുരം മുതൽ തൃശൂർ വരെ 284 കി മീറ്ററാണ് ആദ്യഘട്ടത്തിൽ പൂർത്തിയാകുക. ഇത് തിരുവിതാംകൂർ ലൈൻ എന്നായിരിക്കും അറിയപ്പെടുക. 2027ൽ നിർമാണം തുടങ്ങി 2033ൽ ആദ്യഘട്ടം പൂർത്തീകരിക്കുമെന്ന് ഉത്തരവിൽ പറയുന്നുണ്ട്. പദ്ധതിയുടെ പ്രതീക്ഷിക്കുന്ന ആകെ ചെലവ് 1,92,780 കോടി രൂപയാണ്. ഇത് പ്രതീക്ഷിക്കുന്ന തുകയാണെന്നും അന്തിമ കണക്ക് ഡിപിആർ അടക്കം തയ്യാറാക്കി വരുമ്പോൾ മാത്രമേ വ്യക്തത വരികയുള്ളൂവെന്ന് ഉത്തരവിൽ പറയുന്നുണ്ട്.നിർമാണം തുടങ്ങി 12 വർഷത്തിനകം പദ്ധതി പൂർത്തീകരിക്കാനാകുമെന്നും 2027ൽ ആരംഭിച്ചാൽ 2039ൽ പദ്ധതി പൂർണമായും പൂർത്തികരിക്കാനാകുമെന്നും ഇതിൽ പറയുന്നു. ഗതാഗത വകുപ്പ് കേന്ദ്ര സർക്കാരുമായി ആശയവിനിമയം നടത്തുമെന്നും ഇത് സംബന്ധിച്ചുള്ള കൂടിയാലോചനകളും ഉടൻതന്നെ നടക്കുമെന്നും ഉത്തരവിലുണ്ട് . ആർആർടിഎസിന്റെ ചെലവ് വിഹിതം സംബന്ധിച്ചും ഇതിൽ പറയുന്നുണ്ട്. 20 ശതമാനം വീതം സംസ്ഥാന സർക്കാരും കേന്ദ്ര സർക്കാരും വഹിക്കേണ്ടിവരും. 60 ശതമാനം വായ്പയായിരിക്കും.പദ്ധതിക്ക് മന്ത്രിസഭായോഗം തത്വത്തിൽ അംഗീകാരം നൽകിയതിന് പിന്നാലെയാണ് തുടർനീക്കങ്ങളുമായി സർക്കാർ മുന്നോട്ട് പോകുന്നത്. ഡൽഹി- മീററ്റ് ആർആർടിഎസിന്റെ മാതൃകയിലായിരിക്കും പദ്ധതി കേരളത്തിൽ നടപ്പാക്കുക.
Read More
തൃശൂർ മുതൽ കാസർകോട് വരെ നാളെ സമ്പൂർണ അവധി; രണ്ടാംഘട്ട വോട്ടെടുപ്പ് 7 ജില്ലകളിൽ, അറിയേണ്ടതെല്ലാം
‘രാജേഷ് തലസ്ഥാന നഗരത്തിന് അപമാനം, വി കെ പ്രശാന്തും, ആര്യാ രാജേന്ദ്രനും വികസനത്തെ എത്രത്തോളം ക്രിയാത്മകമായി കണ്ടിരുന്നു എന്ന് ജനം തിരിച്ചറിയുന്നു’; മന്ത്രി വി ശിവൻകുട്ടി
2027 സെൻസസിന് കേന്ദ്ര മന്ത്രിസഭയുടെ അംഗീകാരം, 11,718 കോടി രൂപ ചെലവിൽ നടത്തണം; വീടുകളുടെ പട്ടിക തയ്യാറാക്കുന്നത് 2026 ഏപ്രിലിൽ തുടങ്ങും
എട്ടാം തീയതി വരെ അതിശക്തമായ മഴയ്ക്ക് സാധ്യത; വിവിധ ജില്ലകളിൽ ഓറഞ്ച്, യെല്ലോ അലർട്ടുകൾ
