‘If you kill a cockroach you are a hero, If you kill a butterfly you are bad ‘ നന്മതിന്മകളുടെ വൈരുദ്ധ്യം നിറഞ്ഞ ഈ ചിന്ത പങ്കുവെച്ചുകൊണ്ടാണ് ‘ആശ’ ആരംഭിക്കുന്നത്. തീർത്തും സുപരിചിതമായ ഒരു കുടുംബ പശ്ചാത്തലത്തിലൂടെയും ജീവിത സാഹചര്യങ്ങളിലൂടെയും കഥ പറഞ്ഞു തുടങ്ങുന്ന ചിത്രം, വളരെ പെട്ടെന്നാണ് പ്രേക്ഷകരെ ഞെട്ടിച്ചുകൊണ്ട് ഊഹങ്ങൾക്കപ്പുറമുള്ള മറ്റൊരു ത്രില്ലർ തലത്തിലേക്ക് മാറുന്നത്.
ഒരു റോഡ് അപകടത്തെ തുടർന്നുണ്ടാകുന്ന ചെറിയൊരു തർക്കവും പൊലീസ് കേസുമാണ് ചിത്രത്തിന്റെ കേന്ദ്ര പ്രമേയം. ഒരു സാധാരണ കേസായി ഒതുങ്ങിത്തീരേണ്ട വിഷയം രണ്ട് വ്യത്യസ്ത വ്യക്തികളുടെ ഈഗോയും പിടിവാശിയും കാരണം എത്രത്തോളം സങ്കീർണ്ണവും അപകടകരവുമായ അവസ്ഥയിലേക്ക് മാറുന്നുവെന്ന് ചിത്രം വ്യക്തമായി കാണിച്ചുതരുന്നു.
ഉർവശിയുടെ പ്രകടനം തന്നെയാണ് ചിത്രത്തിന്റെ പ്രധാന ആകർഷണം. സ്നേഹമുള്ള, എന്നാൽ കാർക്കശ്യക്കാരിയായ അമ്മ കഥാപാത്രമായി ഉർവശി തകർത്താടി. നായികയാണോ അതോ പ്രതിനായികയാണോ എന്ന് പ്രേക്ഷകരെ ഒരേ സമയം സംശയിപ്പിക്കുന്ന തരത്തിലാണ് അവരുടെ ഭാവമാറ്റങ്ങൾ.
ഓരോ രംഗത്തിലും അവർ പുലർത്തുന്ന സൂക്ഷ്മതയും ഡയലോഗ് ഡെലിവറിയും തീയറ്ററിൽ കയ്യടി നേടി ഉർവശിയുടെ ശക്തമായ കഥാപാത്രത്തിന് ഒപ്പം നിൽക്കുന്ന എതിരാളിയായിട്ടാണ് ജോജു ജോർജ് എത്തുന്നത്. തന്റെ ബോഡി ലാംഗ്വേജ് കൊണ്ടും തനതായ അഭിനയ ശൈലി കൊണ്ടും ജോജു ഈ ചിത്രത്തിൽ വീണ്ടും മാജിക് തീർത്തു. ഇരുവരും തമ്മിലുള്ള ഇഗോ ക്ലാഷ് രംഗങ്ങൾ സ്ക്രീനിൽ ഉണ്ടാക്കുന്ന മാസ്സ് എനർജി തിയേറ്റർ അനുഭവം മികച്ചതാക്കുന്നു.മകളായി എത്തുന്ന ഐശ്വര്യ ലക്ഷ്മിയും വിജയരാഘവനും തങ്ങളുടെ ഭാഗങ്ങൾ മികച്ച രീതിയിൽ പൂർത്തിയാക്കിയിട്ടുണ്ട്.
നവാഗതനായ സഫർ സനലിന്റെ സംവിധാന മികവ് ഓരോ ഫ്രെയിമിലും വ്യക്തമാണ്. തുടക്കം മുതൽ ഒടുക്കം വരെ പ്രവചനാതീതമായ സസ്പെൻസും പേസിങ്ങും നിലനിർത്താൻ തിരക്കഥയ്ക്ക് സാധിച്ചു. കഥാപാത്രങ്ങളുടെ വൈകാരിക സംഘർഷങ്ങൾക്ക് അനുയോജ്യമായ പശ്ചാത്തല സംഗീതവും ക്യാമറ വർക്കും ചിത്രത്തിന്റെ ത്രില്ലർ അന്തരീക്ഷം ഇരട്ടിയാക്കുന്നു.
ആരാണ് ശരി, ആരാണ് തെറ്റ് എന്ന് അവസാന നിമിഷം വരെ തിരിച്ചറിയാനാകാതെ പ്രേക്ഷകരെ തീയേറ്റർ സീറ്റിന്റെ മുനമ്പിൽ ഇരുത്തുന്ന മികച്ചൊരു ത്രില്ലറാണ് ‘ആശ’. അടുത്തകാലത്ത് മലയാളത്തിലിറങ്ങിയ ഏറ്റവും ഗ്രിപ്പിംഗ് ആയ, തീർച്ചയായും തിയേറ്ററ്ററിൽ തന്നെ കണ്ട് ആസ്വദിക്കേണ്ട ഒരു ചിത്രമാണിത്.
