വാഷിങ്ടൻ ∙ വ്യാജ യോഗ്യതാ വിവാദങ്ങളിലും മോശം പ്രകടനത്തിലും ഉലഞ്ഞ് ഒടുവിൽ ഡോണൾഡ് ട്രംപ് ഭരണകൂടത്തിന്റെ പുതിയ വൈറ്റ് ഹൗസ് പ്രസ് സെക്രട്ടറി കാറ്റി സക്കറിയയെ പദവിയിൽ നിന്ന് പുറത്താക്കി. ഒക്ടോബർ 10ന് ചുമതലയേറ്റ കാറ്റിക്ക് വെറും അഞ്ച് ദിവസത്തെ ആയുസ്സ് മാത്രമേ പദവിയിൽ ലഭിച്ചുള്ളൂ. ഇതോടെ ട്രംപിന്റെ ആദ്യ ഭരണകാലത്ത് 11 ദിവസം മാത്രം കമ്യൂണിക്കേഷൻസ് ഡയറക്ടറായിരുന്ന ആന്റണി സ്കരാമുച്ചിയുടെ റെക്കോർഡ് തകർത്ത്, വൈറ്റ് ഹൗസിന്റെ ചരിത്രത്തിൽ ഏറ്റവും കുറഞ്ഞ കാലം സേവനമനുഷ്ഠിച്ച പ്രസ് സെക്രട്ടറി എന്ന പേരുദോഷം കാറ്റിക്ക് സ്വന്തമായി. പദവിയിൽ നിന്ന് കാറ്റിയെ നീക്കിയതായും അവർക്ക് പുതിയ മറ്റൊരു ചുമതല നൽകുമെന്നും വൈറ്റ് ഹൗസ് കമ്യൂണിക്കേഷൻസ് ഡയറക്ടർ സ്റ്റീവൻ ചെങ് സ്ഥിരീകരിച്ചു.
കൺസർവേറ്റീവ് രാഷ്ട്രീയ നിരീക്ഷകയായിരുന്ന കാറ്റി സക്കറിയയെ പ്രസ് സെക്രട്ടറിയായി നിയമിച്ച വേളയിൽ ട്രംപ് അവരൊരു അഭിഭാഷകയാണെന്നാണ് വിശേഷിപ്പിച്ചത്. കാറ്റിയും മുൻപ് പല മാധ്യമ അഭിമുഖങ്ങളിലും താനൊരു അഭിഭാഷകയാണെന്ന് അവകാശപ്പെട്ടിരുന്നു. എന്നാൽ നിയമനത്തിനു പിന്നാലെ ഇവർക്ക് യുഎസിലെ ഒരു സംസ്ഥാനത്തും വക്കീൽ പരീക്ഷ ജയിച്ച രേഖകളില്ലെന്ന് മാധ്യമങ്ങൾ കണ്ടെത്തി.
കഴിഞ്ഞ ചൊവ്വാഴ്ച വൈറ്റ് ഹൗസ് പുൽത്തകിടിയിൽ, ഏത് സംസ്ഥാനത്ത് നിന്നാണ് ബാർ പരീക്ഷ പാസായതെന്ന് മാധ്യമപ്രവർത്തകർ ആവർത്തിച്ചു ചോദിച്ചപ്പോൾ, താൻ ചൈനയിലേക്ക് മാറിയപ്പോൾ എന്നായിരുന്നു കാറ്റിയുടെ വിചിത്രമായ മറുപടി. ഹെലികോപ്റ്ററിന്റെ ശബ്ദം കാരണം ചോദ്യം വ്യക്തമായില്ലെന്നാണ് പിന്നീട് ഇവർ ന്യായീകരിച്ചത്. ഒടുവിൽ കഴിഞ്ഞദിവസം ഫോക്സ് ന്യൂസിനു നൽകിയ അഭിമുഖത്തിൽ, 2011ൽ പെപ്പർഡൈൻ സർവകലാശാലയിൽ നിന്ന് നിയമ ബിരുദം നേടിയെങ്കിലും താൻ ബാർ പരീക്ഷ പാസായിട്ടില്ലെന്ന് കാറ്റിക്ക് പരസ്യമായി സമ്മതിക്കേണ്ടി വന്നു.
കഴിഞ്ഞ ചൊവ്വാഴ്ച കാറ്റി നടത്തിയ ആദ്യ ഔദ്യോഗിക വാർത്താസമ്മേളനവും വലിയ ദുരന്തത്തിലാണ് കലാശിച്ചത്. 14 മിനിറ്റ് നീണ്ടുനിന്ന വാർത്താസമ്മേളനത്തിനിടെ അബദ്ധവശാൽ പ്രസിഡന്റിന്റെ അവർ ഭർത്താവ് എന്ന് അഭിസംബോധന ചെയ്തു. കൂടാതെ തങ്ങൾക്ക് അനുകൂല നിലപാടുള്ള മൂന്ന് മാധ്യമങ്ങളുടെ ചോദ്യങ്ങൾക്ക് മാത്രം മറുപടി നൽകി അവർ പോഡിയത്തിൽ നിന്ന് ഇറങ്ങിപ്പോവുകയും ചെയ്തു. ഇത് ട്രംപ് ക്യാംപിലെ മറ്റ് മുതിർന്ന ഉദ്യോഗസ്ഥരെപ്പോലും ചൊടിപ്പിച്ചു.
Read More
കുടുംബത്തോടൊപ്പം കൂടുതല്‍ സമയം ചെലവഴിക്കണം; വൈറ്റ് ഹൗസ് പ്രസ് സെക്രട്ടറി സ്ഥാനത്ത് നിന്ന് കരോളിന്‍ ലെവിറ്റ് പടിയിറങ്ങുന്നു
പ്രഭാത വാർത്തകൾ
വൈറ്റ് ഹൗസിൽ 400 മില്യൺ ഡോളർ മുടക്കി ബാൾറൂം നിർമാണം: പദ്ധതിക്ക് കോടതിയുടെ വിലക്ക്, ട്രംപിനു തിരിച്ചടി
വൈറ്റ് ഹൗസിന് സമീപം വെടിവെപ്പ്: ഒരാൾക്ക് ഗുരുതര പരുക്ക്, അക്രമിയെ വധിച്ചു
