പി എം ശ്രീ പദ്ധതി മരവിപ്പിക്കൽ; ഇത് എൽഡിഎഫ് രാഷ്ട്രീയത്തിന്റെ വിജയം , ബിനോയ് വിശ്വം

പി എം ശ്രീ പദ്ധതി മരവിപ്പിക്കണം എന്നാവശ്യപ്പെട്ടുകൊണ്ട് സർക്കാർ കേന്ദ്രത്തിന് കത്തയച്ചത് എൽഡിഎഫിന്റെ രാഷ്ട്രീയ വിജയമാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. സിപിഐ വീണ്ടും രാഷ്ട്രീയ സമ്മർദ്ദം ശക്തമാക്കിയതോടെയാണ് കത്തയക്കാൻ സർക്കാർ നിർബന്ധിതമായത്. മന്ത്രിസഭ തീരുമാനം എടുത്ത് രണ്ടാഴ്ചയായിട്ടും കത്ത് അയക്കാത്തതിൽ അതൃപ്തി അറിയിച്ച് സി.പി.ഐ മന്ത്രിമാർ ഇന്ന് രാവിലെ മുഖ്യമന്ത്രിയെ കണ്ടിരുന്നു. ഇതിന് പിന്നാലെ കത്തയക്കൽ നടപടികൾക്ക് വേഗം വന്നത് ബിനോയ് വിശ്വം വ്യക്തമാക്കി.

പി എം ശ്രീ പദ്ധതിയിൽ സിപിഐയ്ക്കും സിപിഐഎമ്മിനും ഈ വഴിയ്ക്കല്ലാതെ വേറൊരു വഴിയ്ക്കും പോകാൻ സാധിക്കില്ല. ആർഎസ്എസിന്റെ വിദ്യാഭ്യാസരംഗത്തെ നുഴഞ്ഞുകയറ്റത്തിനെതിരായ അജണ്ടയ്ക്കെതിരെയുള്ള വിജയമാണ്. ഇക്കാര്യത്തിൽ എൽഡിഎഫിൽ എല്ലാവർക്കും അഭിമാന ബോധമുണ്ട്. പ്രധാനപ്പെട്ട കാര്യം നടന്നു കഴിഞ്ഞു. ഇനി സബ് കമ്മിറ്റിയെല്ലാം അതിന്റെ വഴിക്ക് പോകുമെന്നും അദ്ദേഹം പറഞ്ഞു.

അതേസമയം, ഉപസമിതി റിപ്പോർട്ട് ലഭിക്കുന്നത് വരെ പി എം ശ്രീ പദ്ധതി മരവിപ്പിക്കണമെന്നാണ് കത്തിലെ ആവശ്യം. സിപിഐ കലാപക്കൊടി ഉയർത്തിയതോടെ ഇടതുമുന്നണിയിൽ രാഷ്ട്രീയ പ്രതിസന്ധി
സൃഷ്ടിച്ച പി.എം.ശ്രീ പദ്ധതി വിവാദത്തിലെ പ്രധാന ഒത്തുതീർപ്പ് വ്യവസ്ഥയായിരുന്നു കത്തയക്കൽ. മന്ത്രിസഭാ തീരുമാനം വന്ന് 13 ദിവസം കഴിയുമ്പോഴാണ് കേന്ദ്രത്തിന് കത്തയക്കണമെന്ന വ്യവസ്ഥ പാലിക്കുന്നത്. ഇന്ന് രാവിലെയോടെ സർക്കാരിന് വേണ്ടി പൊതുവിദ്യാഭ്യാസ സെക്രട്ടറി കെ.വാസുകി ആണ് കേന്ദ്ര മാനവവിഭവ ശേഷി മന്ത്രാലയത്തിന് കത്തയച്ചത്.