ശബരിമല സ്വര്‍ണക്കൊള്ള കേസില്‍ അന്വേഷണം കൂടുതല്‍ ശക്തമായതോടെ സിപിഐഎം പ്രതിരോധത്തിലായിരിക്കയാണ്. ദേവസ്വം ബോര്‍ഡ് മുന്‍ അധ്യക്ഷന്മാര്‍ പ്രതിപട്ടികയില്‍ വരികയും നിലവിലുള്ള അധ്യക്ഷനും ഭരണ സമിതിയും സംശയനിഴലില്‍ ആവുകയും ചെയ്തതോടെ ദേവസ്വം ബോര്‍ഡ് പുനസംഘടിപ്പിച്ച് വിവാദത്തില്‍ കൂടുതല്‍ പരുക്കേല്‍ക്കാതെ രക്ഷപ്പെടാനുള്ള വഴികള്‍ അന്വേഷിക്കുകയാണ് പാര്‍ട്ടി നേതൃത്വം. തദ്ദേശ തിരഞ്ഞെടുപ്പ്, മാസങ്ങള്‍ക്കുള്ളില്‍ നടക്കാനിരിക്കുന്ന നിയമസഭാ തിരഞ്ഞെടുപ്പ് എന്നിവയില്‍ ശബരിമല സ്വര്‍ണക്കൊള്ള പ്രതിപക്ഷം മുഖ്യതിരഞ്ഞെടുപ്പ് ആയുധമാക്കുമെന്ന ഭയവും സിപിഐഎമ്മിനുണ്ട്
മുന്‍ ദേവസ്വം ബോര്‍ഡ് അധ്യക്ഷന്മാര്‍ പ്രതിപ്പട്ടികയില്‍ വരുന്നതില്‍ സിപിഐഎം നേരത്തെതന്നെ കടുത്ത പ്രതിരോധത്തിലായിരുന്നു. മുന്‍ പ്രസിഡന്റുമാരില്‍ രണ്ടുപേര്‍ സിപിഐഎമ്മിന്റെ അറിയപ്പെടുന്ന നേതാക്കളാണെന്നതാണ് പാര്‍ട്ടിക്ക് ക്ഷീണമുണ്ടാക്കുന്നത്. ദേവസ്വം ബോര്‍ഡ് അധ്യക്ഷനായ പ്രശാന്തിനെതിരെ അന്വേഷണം നീളുന്നതായാണ് ലഭ്യമാവുന്ന റിപ്പോര്‍ട്ടുകള്‍. ഇതിന്റെ പശ്ചാത്തലത്തിലാണ് പ്രശാന്തിനെ അധ്യക്ഷസ്ഥാനത്തുനിന്നും നീക്കാന്‍ സര്‍ക്കാര്‍ ആലോചനകള്‍ തുടങ്ങിയത്. ഭരണസമിതിയുടെ കാലാവധി ഈമാസം അവസാനിക്കുകയാണ്. പ്രത്യേക ഉത്തരവുപ്രകാരം പി എസ് പ്രശാന്തിന് ഒരു വര്‍ഷം കൂടി കാലാവധി നീട്ടിനല്‍കാനുള്ള തീരുമാനത്തില്‍ നിന്നും സിപിഐഎമ്മും പിന്നോട്ടുപോവുകയാണ്. പി എസ് പ്രശാന്തിനെ അധ്യക്ഷസ്ഥാനം ഏല്‍പ്പിച്ചത് തെറ്റായ തീരുമാനമായിരുന്നുവെന്ന അഭിപ്രായവും സിപിഐഎം നേതാക്കളില്‍ രൂപംകൊണ്ടിരിക്കുകയാണ്. പാര്‍ട്ടിയെ പ്രതിസന്ധിയിലാക്കാതെ ദേവസ്വം ബോര്‍ഡിനെ മുന്നോട്ടുകൊണ്ടുപോകാന്‍ കെല്‍പ്പുള്ള ഒരു ഉന്നതനെ അധ്യക്ഷനായി കൊണ്ടുവരണമെന്നാണ് പാര്‍ട്ടി തീരുമാനം. മുന്‍ എംഎല്‍എ ടി കെ ദേവകുമാര്‍, മുന്‍ എംപി എ സമ്പത്ത് എന്നിവരെയാണ് അധ്യക്ഷപദവിയിലേക്ക് പരിഗണിക്കുന്നത്. ഇതില്‍ എ സമ്പത്തിനാണ് മുന്‍ഗണനയെന്നാണ് ലഭ്യമാവുന്ന വിവരം. തിരഞ്ഞെടുപ്പുകാലമായതിനാല്‍ ശബരിമല സ്വര്‍ണക്കൊള്ളകേസില്‍ പാര്‍ട്ടി വളരെ കരുതലോടെയാണ് മുന്നോട്ടുപോവുന്നത്.
ഹൈക്കോടതി നടത്തിയ പരാമര്‍ശമാണ് സിപിഐഎം മുന്‍ തീരുമാനം തിരുത്താന്‍ കാരണമായിരിക്കുന്നത്. ഒരു വര്‍ഷം കൂടി പി എസ് പ്രശാന്തിന് അധ്യക്ഷസ്ഥാനം തുടരാനുള്ള അനുമതി സിപിഐഎം നല്‍കിയിരുന്നു. എന്നാല്‍ ഗുരുതരമായ കണ്ടെത്തലുകളാണ് അന്വഷണ സംഘം ഹൈക്കോടതിയില്‍ നല്‍കിയിരിക്കുന്ന റിപ്പോര്‍ട്ടിലുള്ളത്. സ്വര്‍ണക്കൊള്ളയിലെ അന്വേഷണം നിലവിലുള്ള ഭരണസമിതിയിലേക്ക് നീങ്ങുന്നതാണ് സര്‍ക്കാരിനേയും വെട്ടിലാക്കിയിരിക്കുന്നത്.
തിരുവിതാംകൂര്‍ ദേവസ്വം ബോര്‍ഡ് അധ്യക്ഷനെന്ന നിലയില്‍ അഡ്വ. പി എസ് പ്രശാന്ത് സ്വര്‍ണക്കവര്‍ച്ചാകേസില്‍ ചോദ്യം ചെയ്യപ്പെടുന്നതും, അറസ്റ്റുചെയയ്യപ്പെടുന്നതും സര്‍ക്കാറിന് വലിയ തിരിച്ചടിയാവും. ഇതോടെയാണ് സി പി ഐ എം നേതൃത്വം തിരക്കിട്ട തീരുമാനങ്ങളിലേക്ക് നീങ്ങിയത്. പ്രത്യേക അന്വേഷണ സംഘം ഉടന്‍ പ്രശാന്തിനെ ചോദ്യം ചെയ്യാനുള്ള സാധ്യമുന്നില്‍ കണ്ടാണ് തിരുവിതാംകൂര്‍ ദേവസ്വം അധ്യക്ഷനെ മാറ്റാന്‍ ചര്‍ച്ചകള്‍ ആരംഭിച്ചിരിക്കുന്നത്.
നാളെ ചേരുന്ന സി പി ഐ എം സംസ്ഥാന സെക്രട്ടറിയേറ്റില്‍ അന്തിമ തീരുമാനമുണ്ടാവും. ഹൈക്കോടതിയുടെ ഇടക്കാല ഉത്തരവിന്റെ വെളിച്ചത്തിലാണ് സിപിഐഎം പ്രശാന്തിന്റെ കാര്യത്തില്‍ പെട്ടെന്ന് തീരുമാനമെടുത്തത്. നേരത്തെ ബോര്‍ഡ് പുനസംഘടന വേണ്ടെന്നും പ്രശാന്തിനെ തുടരാന്‍ അനുവദിക്കുമെന്നുമായിരുന്നു സര്‍ക്കാര്‍ വൃത്തങ്ങള്‍ വ്യക്തമാക്കിയിരുന്നത്.
മുന്‍ അധ്യക്ഷനായിരുന്ന എന്‍ വാസുവിനെ കേസില്‍ മൂന്നാം പ്രതിയായി ചേര്‍ത്തതോടെ മുന്‍ അധ്യക്ഷന്മാരും നിലവിലുള്ള പ്രസിഡന്റും സംശയനിഴലിലാണ്. സിപിഐഎം നേതാക്കളായ മുന്‍ അധ്യക്ഷന്മാര്‍ കേസില്‍ പ്രതിപ്പട്ടികയില്‍ ഉള്‍പ്പെടുന്നതും പാര്‍ട്ടി നേതൃത്വം ഗൗരവത്തോടെയാണ് നിരീക്ഷിക്കുന്നത്.
തിരുവിതാംകൂര്‍ ദേവസ്വം ബോര്‍ഡ് മുന്‍ അധ്യക്ഷന്മാരായ നാലുപേരില്‍ ഒരാള്‍ മുന്‍ദേവസ്വം ബോര്‍ഡ് ജീവനക്കാരനായിരുന്നു. സിപിഐഎം സംഘടനയുടെ നേതാവായിരുന്ന എന്‍ വാസുവിനെ വിരമിച്ചശേഷം ദേവസ്വം ബോര്‍ഡ് അധ്യക്ഷനാക്കുകയായിരുന്നു. നിലവില്‍ പ്രത്യേക അന്വേഷണ സംഘം പ്രതിചേര്‍ത്തതോടെ വിവാദം ഉണ്ണികൃഷ്ണന്‍ പോറ്റിയിലും മുരാരി ബാബുവിലും അവസാനിക്കില്ലെന്ന് വ്യക്തമായിരിക്കയാണ്. 2017 ല്‍ കട്ടിളപ്പടി അറ്റകുറ്റപ്പണികള്‍ക്കായി ചെന്നൈയിലേക്ക് കൊണ്ടുപോകുന്ന സമയത്ത് രജിസ്റ്ററില്‍ പടി സ്വര്‍ണം പൊതിഞ്ഞതാണെന്ന് അറിയാമായിരുന്നിട്ടും ചെമ്പെന്ന് രേഖപ്പെടുത്തിയത് ഗൂഢാലോചനയുടെ ഭാഗമാണെന്നാണ് പ്രത്യേക അന്വേഷണ സംഘം കണ്ടെത്തിയിരിക്കുന്നത്.
എ പത്മകുമാര്‍, അഡ്വ കെ അനന്തഗോപന്‍ എന്നിവര്‍ സി പി ഐ എമ്മിന്റെ പത്തനംതിട്ടയിലെ നേതാക്കളാണ്. എ പത്മകുമാര്‍ മുന്‍ എം എല്‍ എയും, അനന്തഗോപന്‍ സി പി ഐ എം സംസ്ഥാനകമ്മിറ്റി അംഗവും പാര്‍ട്ടിയുടെ മുന്‍ ജില്ലാ സെക്രട്ടറിയുമായിരുന്നു. മുന്‍ ദേവസ്വം ബോര്‍ഡ് ജീവനക്കാരനായിരുന്ന എന്‍ വാസുവിനെ ചട്ടങ്ങള്‍ മറികടന്നാണ് അധ്യക്ഷസ്ഥാനത്തുനിയമിച്ചത്. പിന്നീട് അനന്തഗോപനെ പാര്‍ട്ടി ജില്ലാ സെക്രട്ടറി സ്ഥാനത്തുനിന്നും മാറ്റിയാണ് തിരുവിതാംകൂര്‍ ദേവസ്വം ബോര്‍ഡ് അധ്യക്ഷനാക്കാന്‍ സി പി ഐ എം സംസ്ഥാന കമ്മിറ്റി തീരുമാനിക്കുകയായിരുന്നു. പിന്നീട് അഡ്വ പി എസ് പ്രശാന്ത് കോണ്‍ഗ്രസിനോട് വിടപറഞ്ഞ് സി പി ഐ എമ്മില്‍ ചേര്‍ന്നതോടെയാണ് അനന്തഗോപനെ അധ്യക്ഷസ്ഥാനത്തുനിന്നും മാറ്റി പി എസ് പ്രശാന്തിനെ നിയമിച്ചത്.
Read More
ശബരിമല സ്വര്‍ണപ്പാളി വിവാദം; ഉണ്ണികൃഷ്ണന്‍ പോറ്റി ആരുടെ ബിനാമി ?
ശബരിമല സ്വര്‍ണ്ണക്കൊള്ള; 2019 ല്‍ കട്ടിള പാളി കൊണ്ടു പോയത് ബോര്‍ഡ് അറിഞ്ഞില്ലെന്ന വാദം നിലനില്‍ക്കില്ല; തെളിയിക്കുന്ന ദേവസ്വം ആക്ടിന്റെ പകര്‍പ്പ് പുറത്ത്
ശബരിമലയിൽ ഏറ്റവും കൂടുതൽ കൊള്ള നടന്നത് ഉമ്മൻ ചാണ്ടിയുടെ കാലത്ത്’; സജി ചെറിയാൻ
‘ ഉണ്ണികൃഷ്ണന്‍ പോറ്റിയുമായി സര്‍ക്കാരിനും ദേവസ്വം ബോര്‍ഡിനും എന്ത് ബന്ധം? സമഗ്ര അന്വേഷണം നടത്തണം’; വി ഡി സതീശന്‍
