‘സമദൂര നിലപാടിൽ മാറ്റമില്ല, ഒരു രാഷ്ട്രീയ പാർട്ടിയുടെ കൂടെയും ഞങ്ങളില്ല’; ജി സുകുമാരൻ നായർ

ശബരിമല വിഷയത്തിൽ സർക്കാരിനെ പിന്തുണച്ച നിലപാടിൽ മാറ്റമില്ലെന്ന് എൻഎസ്എസ് ജനറൽ സെക്രട്ടറി ജി സുകുമാരൻ നായർ.രാഷ്ട്രീയ നിലപാട് കൃത്യമായി വിശദീകരിച്ചിട്ടുണ്ട്. ഏത് പ്രതിഷേധത്തെയും നേരിടുമെന്നും ജി സുകുമാരൻ നായർ പറഞ്ഞു.രാഷ്ട്രീയ നിലപാടില്ലെങ്കിലും ഇപ്പോഴത്തേത് സമദൂരത്തിലെ ശരിദൂരമെന്നും എൻഎസ്എസ് പ്രതിനിധി സഭയിൽ വ്യക്തമാക്കി.

പ്രതിനിധി സഭയിൽ നിലപാട് വ്യക്തമാക്കിയ ജി സുകുമാരൻ നായർ കോൺഗ്രസിനേയും ബിജെപിയേയും വിമർശിച്ചു. നിയമനിർമാണം നടത്തുമെന്ന് പറഞ്ഞ ബിജെപി വഞ്ചിച്ചു. കോൺഗ്രസ് ഒന്നും ചെയ്തില്ല. ജനറൽ സെക്രട്ടറിയുടെ നിലപാടിനെ പ്രതിനിധി സഭാംഗങ്ങൾ പിന്തുണച്ചു.

സുകുമാരൻ നായരെ വിമർശിച്ചുകൊണ്ട് പത്തനംതിട്ടയിലും കോട്ടയത്തുമടക്കം ഫ്ലക്സ് പ്രത്യക്ഷപ്പെട്ടിരുന്നു. സുകുമാരൻ നായർ രാജിവെക്കണമെന്നും അയ്യപ്പ വിശ്വാസികളെയും സമുദായ അംഗങ്ങളെയും വഞ്ചിച്ചു എന്നും എഴുതിയ ഫ്ളക്സുകളാണ് സുകുമാരൻ നായർക്കെതിരെ ഉയരുന്നത്.