സുധാകരനെ പുകച്ചു പുറത്തു ചാടിച്ചതാര്? ആലപ്പുഴയിൽ താക്കീതോ സ്ഥാനമാറ്റമോ? സിപിഎം ജില്ലാ കമ്മിറ്റി നാളെ

കോട്ടയം ∙ തിരഞ്ഞെടുപ്പു തോൽവി ചർച്ച ചെയ്യാൻ ചേരുന്ന വിപുലീകൃത ജില്ലാ കമ്മിറ്റികളിൽ ആദ്യത്തേത് നാളെ ആലപ്പുഴയിൽ. ജി.സുധാകരൻ എംഎൽ‌എയെ പാർട്ടി വിടാനുള്ള സാഹചര്യം അടക്കം സംഘടനാ വീഴ്ചകൾ ചർച്ചയാകും. സുധാകരൻ പ്രശ്നം വഷളാക്കിയ രണ്ടു മുതിർന്ന നേതാക്കൾക്ക് താക്കീതിന് സാധ്യത. സംഘടനാ വീഴ്ചയുടെ പേരിൽ വിമർശനം ഉയർന്നാൽ ജില്ലാ സെക്രട്ടറി മാറാനും സാധ്യത. ജില്ലാ സെക്രട്ടേറിയറ്റ് അഴിച്ചു പണിക്കും കളമൊരുങ്ങുന്നു. ദേശീയ സെക്രട്ടറി എം.എ.ബേബി ശക്തമായി ഇടപെട്ടാൽ ജില്ലാ സെക്രട്ടേറിയറ്റിൽ പുതുമുഖങ്ങൾക്ക് ഇടം ലഭിക്കും. വിപുലീകൃത സംസ്ഥാന കമ്മിറ്റിയുടെ പാത പിന്തുടർന്നാൽ കർശന നടപടിക്ക് സാധ്യത. ജില്ലാ കമ്മിറ്റി യോഗങ്ങളിൽ ആദ്യത്തേത് ആയതിനാൽ നേതൃത്വം കരുതലോടെയാണ് ഇടപെടുന്നത്. ഗുരുതരമായ സംഘടനാ വീഴ്ചയുണ്ടായെന്ന് സംസ്ഥാന റിപ്പോർട്ടിൽ കണ്ടെത്തിയ ജില്ലകളിലൊന്നാണ് ആലപ്പുഴ. എറണാകുളം, കൊല്ലം, പാലക്കാട് എന്നിവയാണ് മറ്റ് ജില്ലകൾ. പിണറായി വിജയന്റെ നേതൃത്വത്തിൽ മുതിർന്ന 10 നേതാക്കൾ യോഗത്തിൽ പങ്കെടുക്കുന്നുണ്ട്. സമ്മേളനം ഉദ്ഘാടനം ചെയ്യുന്ന പിണറായി വിജയൻ രണ്ടു ദിവസവും പങ്കെടുക്കും. കെ.രാധാകൃഷ്ണൻ, കെ.കെ.ശൈലജ, സി.എസ്.സുജാത, എളമരം കരീം, സി.എൻ.മോഹനൻ, വി.ശിവൻ കുട്ടി, പി.കെ.ശ്രീമതി തുടങ്ങിയവരാണ് നേതൃത്വത്തെ പ്രതിനിധീകരിക്കുന്നത്.

സിപിഎം ശക്തികേന്ദ്രമായ ആലപ്പുഴയിൽ കാലങ്ങളായി വിഭാഗീയതയ്ക്കും കുറവില്ല. ഒരു വിഭാഗം നേതാക്കൾ മുൻ മന്ത്രി സജി ചെറിയാനെ അനൂകൂലിക്കുമ്പോൾ മറു വിഭാഗം ജില്ലാ സെക്രട്ടറി ആർ. നാസറെ പിന്തുണയ്ക്കുന്നു. മുതിർന്ന നേതാക്കളുടെ സംഘം ഇരു വിഭാഗത്തിൽനിന്നും അകന്നു നിൽക്കുന്നു. മുതിർന്ന നേതാക്കളിൽ ചിലർ സ്വയം ഒഴിയാനും തയാറായെന്നാണ് സൂചന. കുട്ടനാട്, കായംകുളം മണ്ഡലങ്ങളിൽ സംഘടനാ വീഴ്ചയുണ്ടായെന്ന് ഒരു വിഭാഗം ആരോപിക്കുന്നു. ജി. സുധാകരനാകട്ടെ ഒരു വിഭാഗത്തെ കഴിഞ്ഞ ദിവസം കടന്നാക്രമിച്ചു. ചില നേതാക്കളുടെ ഇടപെടലാണ് ജി. സുധാകരൻ പാർട്ടി വിടാൻ കാരണമെന്നാണ് ഒരു വിഭാഗത്തിന്റെ വിമർശനം. അതേസമയം സംഘടനാ തലത്തിലെ വീഴ്ചകൾ ഉന്നയിച്ച് മറുവിഭാഗം നേതൃത്വത്തെ വിമർശിക്കുന്നു.

സിപിഎമ്മിനെ സംബന്ധിച്ച് ആലപ്പുഴ ജില്ലാ സമ്മേളനം നിർണായകമാണ്. ശക്തമായ നടപടിക്കും ഒപ്പം സമവായത്തിനും വിപുലീകൃത സംസ്ഥാന കമ്മിറ്റി തുടക്കമിട്ടു. എന്നാൽ നേതൃത്വത്തിനെതിരെ രൂപപ്പെടുന്ന എതിർപ്പ് എത്രത്തോളമെന്ന് ആലപ്പുഴ സമ്മേളനത്തിൽ വ്യക്തമാകും. എം.എ.ബേബിക്ക് സ്വാധീനമുള്ള ജില്ലകളിലൊന്നാണ് ആലപ്പുഴ. കഴിഞ്ഞ ജില്ലാ സമ്മേളനത്തിലും ബേബി ഇടപെട്ട് ജില്ലാ സെക്രട്ടറിയേറ്റിൽ ചില നേതാക്കളെ ഉൾപ്പെടുത്തിയിരുന്നു. ബേബിയുടെ ഇടപെടൽ വിപുലീകൃത ജില്ലാ കമ്മിറ്റിയിലും പ്രതിഫലിച്ചേക്കാം.