‘പാറ്റകള്‍ ലക്ഷ്യം കണ്ടു, പ്രധാൻ ഇനി അപ്രധാൻ’; രാഷ്ട്രസേവനത്തിന് മുൻഗണന, പ്രധാനമന്ത്രിക്ക് നന്ദി അറിയിച്ച് ധര്‍മേന്ദ്ര പ്രധാന്‍

വിദ്യാർത്ഥികളുടെ ഭാവി നിയമക്കുരുക്കുകളിൽ പെടുത്താൻ ആഗ്രഹിക്കുന്നില്ലെന്ന് രാജിക്ക് പിന്നാലെ പ്രതികരിച്ച് ധര്‍മേന്ദ്ര പ്രധാന്‍. കഴിഞ്ഞ 10 ദിവസത്തെ സംഭവവികാസങ്ങൾ വേദനിപ്പിച്ചു. ഇത് വ്യക്തിപരമായ അഭിമാനത്തിന്റെ പ്രശ്നമല്ല. രാജ്യവിരുദ്ധ ശക്തികൾ നിലവിലെ സാഹചര്യം മുതലെടുക്കാൻ പാടില്ല. വിദ്യാർത്ഥികളെ വഴിതെറ്റിക്കാൻ ചിലർ ശ്രമിക്കുന്നു. രാജ്യത്തെ യുവജനങ്ങളെ ഭ്രമത്തിന്റെ വലയിൽ പെടുത്താൻ അനുവദിക്കില്ല. രാഷ്ട്രസേവനത്തിനാണ് ജീവിതത്തിലെ ഏറ്റവും വലിയ മുൻഗണന. പ്രധാനമന്ത്രിക്ക് നന്ദി.

ശക്തവും ദീർഘദർശിയുമായ ഒരു വിദ്യാഭ്യാസ സംവിധാനമാണ് രാഷ്ട്രത്തിന്റെ അടിത്തറ എന്ന് ഞാൻ എന്നും വിശ്വസിച്ചിക്കുന്നുവെന്നും ധര്‍മേന്ദ്ര പ്രധാന്‍ വ്യക്തമാക്കി. രാജ്യത്തെ യുവാക്കളുടെ അഭിലാഷങ്ങളെയും വികാരങ്ങളെയും ന്യായമായ പ്രതീക്ഷകളെയും ഞാൻ ആഴത്തിൽ ബഹുമാനിക്കുന്നു. ഇന്ത്യയിലെ യുവതലമുറയുടെ സ്വപ്നങ്ങൾ സാക്ഷാത്കരിക്കുക എന്നത് നമ്മുടെയെല്ലാം രാഷ്ട്രീയവും സാമൂഹികവുമായ ജീവിതത്തിന്റെ ധാർമ്മിക പ്രതിജ്ഞയാണ്. ബഹുമാനപ്പെട്ട പ്രധാനമന്ത്രിയുടെ ദീർഘദർശിയായ നേതൃത്വത്തിൽ രാഷ്ട്രത്തെ സേവിക്കാൻ എനിക്ക് ലഭിച്ച അവസരത്തിന് ഞാൻ പ്രധാനമന്ത്രിയോട് നന്ദി രേഖപ്പെടുത്തുന്നു.

ഈ കാലയളവിൽ, 20 ലക്ഷത്തിലധികം വിദ്യാർത്ഥികളുടെ പരീക്ഷ സുഗമമായി നടത്തുക എന്നതായിരുന്നു ഞങ്ങളുടെ പ്രധാന മുൻഗണന. ഇതിനായി പ്രവർത്തിച്ചു. ഇതിൽ കേന്ദ്ര സർക്കാരിനൊപ്പം സംസ്ഥാന സർക്കാരുകൾക്കും, പ്രത്യേകിച്ച് ജില്ലാ ഭരണകൂടങ്ങൾക്കും സുപ്രധാന പങ്കുണ്ടായിരുന്നു. വിദ്യാർത്ഥികളുടെയും രക്ഷിതാക്കളുടെയും മാതാപിതാക്കളുടെയും സഹകരണത്തോടെ 2026 ജൂൺ 21-ന് ഈ പരീക്ഷ പൂർത്തിയായി. ആദ്യ ദിവസം മുതൽ തന്നെ ഞാൻ ഇതിന്റെ ഉത്തരവാദിത്തം ഏറ്റെടുത്തു, ഈ സാഹചര്യത്തിൽ നിന്ന് ഒരിക്കലും മുഖം തിരിച്ചില്ല.

പരീക്ഷാ മാഫിയ കാരണം ഒരു മിടുക്കനായ വിദ്യാർത്ഥിയുടെയും സാധ്യതയും തകരാൻ അനുവദിക്കില്ല, ഒരു വിദ്യാർത്ഥിയോടും അനീതി ഉണ്ടാകാൻ അനുവദിക്കില്ല എന്നതായിരുന്നു എന്റെ പ്രതിജ്ഞയെന്നും അദ്ദേഹം ചൂണ്ടിക്കാട്ടി. ജൂലൈ 16-ന് പ്രഖ്യാപിച്ച നീറ്റ്-യുജി ഫലങ്ങൾ തൃപ്തികരമായിരുന്നു, ദരിദ്ര പശ്ചാത്തലത്തിൽ നിന്നുള്ള നിരവധി മിടുക്കരായ വിദ്യാർത്ഥികൾക്കും വിജയം നേടാൻ കഴിഞ്ഞു. എന്നാൽ ഈ കാലയളവിലും, വിദ്യാർത്ഥികളെ തെറ്റിദ്ധരിപ്പിക്കാൻ ഉത്തരവാദിത്തപ്പെട്ട സ്ഥാനങ്ങളിലിരിക്കുന്ന ചിലർ ശ്രമിച്ചു, ഇത് എന്നെ അതീവം വേദനിപ്പിച്ചു.

നമ്മുടെ ജനാധിപത്യത്തിന്റെ ശക്തിയിൽ ഞാൻ എന്നും അചഞ്ചലമായ വിശ്വാസം പുലർത്തിയിട്ടുള്ള ആളാണ്, യുവാക്കളുടെ അഭിലാഷങ്ങളെയും സ്വപ്നങ്ങളെയും പ്രതീക്ഷകളെയും ആഴത്തിൽ ബഹുമാനിച്ചിട്ടുള്ള ആളുമാണ്. അവർ ഇന്ത്യയുടെ ഭാവി മാത്രമല്ല, മറിച്ച് പുതിയതും വികസിതവുമായ ഇന്ത്യയുടെ വാഹകരും നിർമ്മാതാക്കളും ഭാവിയുടെ ശിൽപ്പികളും കൂടിയാണ്. കഴിഞ്ഞ 10 ദിവസത്തെ സംഭവവികാസങ്ങൾ കണ്ട് എന്റെ മനസ്സ് ദുഃഖിതമാണ്. ഇത് എനിക്ക് വ്യക്തിപരമായ അന്തസ്സിന്റെ വിഷയമല്ല.

ഇന്ത്യയുടെ യുവശക്തിയാണ് ഈ രാജ്യത്തിന്റെ യഥാർത്ഥ ശക്തി. രാജ്യത്തിന്റെ യുവശക്തിയെ ആശയക്കുഴപ്പത്തിന്റെ കെണിയിൽ വീഴാൻ അനുവദിക്കില്ല എന്നതാണ് എന്റെ പ്രതിജ്ഞ. ബഹുമാനപ്പെട്ട പ്രധാനമന്ത്രിയുടെ മാർഗ്ഗനിർദ്ദേശത്തിനും വിശ്വാസത്തിനും തുടർച്ചയായ പിന്തുണയ്ക്കും ഞാൻ ഹൃദയപൂർവ്വം നന്ദി രേഖപ്പെടുത്തുന്നു. അതോടൊപ്പം, മന്ത്രിസഭയിലെ എന്റെ എല്ലാ ബഹുമാന്യരായ സഹപ്രവർത്തകർക്കും,മന്ത്രാലയത്തിലെ ഉദ്യോഗസ്ഥർക്കും ജീവനക്കാർക്കും, എനിക്കൊപ്പം പ്രവർത്തിക്കാൻ ഭാഗ്യം ലഭിച്ച എല്ലാവർക്കും ഞാൻ നന്ദി അറിയിക്കുന്നു. രാഷ്ട്രസേവനമാണ് എന്റെ ജീവിതത്തിലെ പരമോന്നത മുൻഗണന. ഇതിനായി ഞാൻ എന്നും സമർപ്പിതനായി തുടരുമെന്നും അദ്ദേഹം വ്യക്തമാക്കി.