മലയാള സിനിമയുടെ കാരണവര് മധുവിന് ഇന്ന് 93-ാം പിറന്നാള്. വിശേഷണങ്ങള്ക്ക് അതീതനായ അടിമുടി സിനിമാക്കാരനാണ് മധു. മലയാള സിനിമയുടെ ശൈശവ ദശയില് തന്നെ ആ യാത്രയുടെ ഭാഗമായ മധു ഇന്ന് വിശ്രമ ജീവിതത്തിലാണ്. (actor madhu 93rd birthday)
മലയാളിയുടെ ഹൃദയതന്ത്രികളില് അനുരാഗത്തിന്റെയും വിരഹത്തിന്റെയും മധുരനൊമ്പരങ്ങള് മീട്ടിയ മഹാനടനാണ് മധു. ഭാവതീവ്രമായ കഥാപാത്രങ്ങളിലൂടെയാണ് മധു മലയാള ചലച്ചിത്രലോകത്തെ കാരണവരായി മാറിയത്. സിനിമയോടുള്ള അടങ്ങാത്ത അഭിനിവേശമാണ് കോളെജ് അധ്യാപകന്റെ റോളില് നിന്നും മധുവിനെ സ്കൂള് ഓഫ് ഡ്രാമയിലെത്തിച്ചത്.
നസീറും സത്യനും വെള്ളിത്തിരയില് നിറഞ്ഞാടിയ കാലത്ത് മലയാളത്തില് രംഗപ്രവേശം. എം.എന് പിഷാരടി സംവിധാനം ചെയ്ത നിണമണിഞ്ഞ കാല്പ്പാടുകളായിരുന്നു ആദ്യ ചിത്രം. മലയാളിയുടെ വിരഹത്തിന്റെ മുഖമായിരുന്ന ചെമ്മീനിലെ പരീക്കുട്ടി, ഭാര്ഗ്ഗവീനിലയത്തിലെ സാഹിത്യകാരന് , സ്വയംവരത്തിലെ വിശ്വം എന്നിവ മധുവിലെ അഭിനയ പാടവം വെളിവാക്കുന്ന കഥാപാത്രങ്ങളില് ചിലത് മാത്രമാണ്. ഓളവും തീരവും, ഉമ്മാച്ചു, ഇതാ ഇവിടെവരെ, ഏണിപ്പടികള്, ഒറ്റയടിപ്പാതകള്, നാടുവാഴികള്, സ്പിരിറ്റ് തുടങ്ങിയ കലാമൂല്യമുള്ള സിനിമകളിലും കച്ചവടവിജയ ചിത്രങ്ങളിലും നായകനായും, സഹനടനായും, വില്ലനായുമൊക്കെ മധു തിളങ്ങി.
അമിതാഭ് ബച്ചന്റെ അരങ്ങേറ്റ ചിത്രമായ സാഥ് ഹിന്ദുസ്ഥാനിലും മധു സുപ്രധാന വേഷം കൈകാര്യം ചെയ്തു. പന്ത്രണ്ടോളം സിനിമകള് സംവിധാനം ചെയ്ത മധു പതിനാറോളം ചിത്രങ്ങള് നിര്മിക്കുകയും ചെയ്തു. ടെലിവിഷന് പരമ്പരകളിലും നിറ സാന്നിധ്യമായിരുന്ന മധു, ജെ സി ഡാനിയേല് അവാര്ഡ് അടക്കം നിരവധി പുരസ്കാരങ്ങള് നേടിയിട്ടുണ്ട്. ചലച്ചിത്ര മേഖലക്ക് നല്കിയ സംഭാവനകള് പരിഗണിച്ചു രാജ്യം പദ്മശ്രീ നല്കി ആദരിച്ചു.
Read More
സൂപ്പര് സ്റ്റാറിന് ജന്മദിനാശംസകള്; മധുവിന് ആശംസകളുമായി മോഹന്ലാലും മമ്മൂട്ടിയും
SFI നേതാവിനെ കസ്റ്റഡിയിലിട്ട് മര്ദ്ദിച്ചെന്ന ആരോപണം നേരിട്ട ഡിവൈഎസ്പി മധു ബാബുവിന് സ്ഥാനക്കയറ്റം
സിനിമാ നയ രൂപീകരണ കോൺക്ലേവിന് ഇന്ന് സമാപനം, ലക്ഷ്യം സമഗ്രമായ ചലച്ചിത്ര വികസനം
ലോക, കളങ്കാവല്, ബെത്ലഹേം കുടുംബ യൂണിറ്റ്.. ഹാട്രിക് ബ്ലോക്ക്ബസ്റ്റര് വിജയവുമായി ഫ്യൂച്ചര് റണ്ണപ്പ് ഫിലിംസ്
