കൊച്ചി: അറബിക്കടലില് നിന്ന് പുതിയ ഇനം ഈല് മത്സ്യത്തെ കണ്ടെത്തി. പുതിയ മീന് ഇനി സിഎംഎഫ്ആര്ഐയുടെ പേരില് അറയിപ്പെടും. കേന്ദ്ര സമുദ്ര മത്സ്യ ഗവേഷണ സ്ഥാപനത്തിലെ(സിഎംഎഫ്ആര്ഐ) ഗവേഷകര് കൊല്ലം തീരത്തുനിന്ന് ഏകദേശം 300 മീറ്റര് ആഴക്കടലില് നിന്നാണ് മീനിനെ ലഭിച്ചത്.
കഴിഞ്ഞ ജനുവരിയില് ലഭിച്ച മത്സ്യം ശാസ്ത്രീയ പരിശോധനയില് പുതിയ ഇനം ഈല് മത്സ്യമാണെന്ന് സിഎംഎഫ്ആര്ഐയിലെ ഗവേഷകര് തിരിച്ചറിയുകയായിരുന്നു. സിഎംഎഫ്ആര്ഐയുടെ 80ാം വാര്ഷികത്തിന്റെ ഭാഗമായി മീനിന് അരിയോസോമ സിഎംഎഫ്ആര്ഐയന്സെ എന്ന് നാമകരണം ചെയ്തു.
ഇന്ത്യയുടെ ആഴക്കടല് ഗവേഷണ മേഖലയ്ക്ക് ഏറെ ഗുണകരമാകുന്നതാണ് ഈ ഗവഷണ നേട്ടമെന്ന് സിഎംഎഫ്ആര്ഐ ഡയറക്ടര് ഡോ ഗ്രിന്സണ് ജോര്ജ് പറഞ്ഞു. ആഴക്കടല് മത്സ്യസമ്പത്തിനെ കുറിച്ചുള്ള ശാസ്ത്രീയ അറിവുകള് വിപുലപ്പെടുത്താനും അതുവഴി ജൈവവൈവിധ്യ സംരക്ഷണ പരിപാലന രീതികള് മെച്ചപ്പെടുത്താനും സഹായിക്കും.
മീനിന്റെ അടിഭാഗത്ത് കാണപ്പെടുന്ന കറുത്ത പുള്ളികളാണ് പ്രധാന ആകര്ഷണം. ഇതേ വര്ഗത്തില്പെട്ട മറ്റ് ഈല് മത്സ്യങ്ങളില് നിന്ന് വ്യത്യസ്തമായി നിരവധി പ്രത്യേകതകള് ശാസ്ത്രീയ പരിശോധനയില് വ്യക്തമായതോടെയാണ് പുതിയ ഇനം മീനാണെന്ന് ഗവേഷകര് തിരിച്ചറിഞ്ഞത്.
കേന്ദ്ര ഭൗമശാസ്ത്ര മന്ത്രാലയത്തിന്റെ ആഴക്കടല് ദൗത്യത്തിന്റെ ഭാഗമായി സിഎംഎഫ്ആര്ഐ നടപ്പാക്കുന്ന ഗവേഷണത്തിലാണ് പുതിയ മീനിനെ തിരിച്ചറിഞ്ഞത്. ഇവയുടെ വാണിജ്യപരമായ സാധ്യതകള് പഠനം നടത്തി മാത്രമേ പറയാനാകൂവെന്ന് ഗവേഷണ പദ്ധതിക്ക് നേതൃത്വം നല്കുന്ന സിഎംഎഫ്ആര്ഐ പ്രിന്സിപ്പല് സയന്റിസ്റ്റ് ഡോ. രേഖ ജെ. നായര് പറഞ്ഞു.
പുതിയ മത്സ്യം കണ്ടെത്തിയതായുള്ള ശാസ്ത്ര പഠനം അന്താരാഷ്ട്ര ടാക്സോണമിക് ജേണലായ സൂടാക്സയില് പ്രസിദ്ധീകരിച്ചിട്ടുണ്ട്.
Read More
അഷ്ടമുടി കക്ക: പുനരുജ്ജീവന ശ്രമങ്ങള് ഫലം കാണുന്നു; ഡിസംബര് ഒന്ന് മുതല് മൂന്ന് മാസത്തേക്ക് കക്കവാരല് നിരോധിക്കണമെന്ന് സിഎംഎഫ്ആര്ഐ
ഇന്ത്യന് സമുദ്രോല്പ്പന്ന കയറ്റുമതിക്ക് യുഎസ് പച്ചക്കൊടി: വഴി തുറന്നത് സിഎംഎഫ്ആര്ഐ പഠനം
സ്രാവ് പിടിത്തം: മത്സ്യത്തൊഴിലാളികളുടെ ആശങ്കകള് പരഹരിക്കുന്നതിന് സിഎംഎഫ്ആര്ഐ പഠന സമിതി
മത്തിയുടെ ലഭ്യതയിലെ ഏറ്റക്കുറച്ചിലുകള്ക്ക് കാരണം മണ്സൂണ് മഴയും സമുദ്രത്തിലെ മാറ്റങ്ങളും: സിഎംഎഫ്ആര്ഐ പഠനം
