കൽപറ്റ ∙ വയനാട് ജില്ലയുടെ 36-മത് കലക്ടറായി വി. ചെല്സസിനി ചുമതലയേറ്റു. പത്തനംതിട്ട ജില്ലയില് അസിസ്റ്റന്റ് കലക്ടര്, കോഴിക്കോട് സബ് കലക്ടര്, കൊച്ചി കോര്പറേഷന് സെക്രട്ടറി, ഫിഷറീസ് വകുപ്പ് ഡയറക്ടര് പദവികള് വഹിച്ചിട്ടുണ്ട്. 2019 ഐഎഎസ് ബാച്ച് ഉദ്യോഗസ്ഥയാണ്. തമിഴ്നാട് നാഗര്കോവില് സ്വദേശിനിയാണ്. ഐഎഫ്എസ് ഉദ്യോഗസ്ഥനായ വെങ്കിടേശ്വരനാണ് ഭര്ത്താവ്. ഒന്നര വയസ്സുള്ള രാജമാണിക്യം മകനാണ്.
വയനാടിന്റെ സമഗ്ര വികസനത്തിനും ദുരന്തനിവാരണ പ്രവര്ത്തനങ്ങള്ക്കും മുന്ഗണന നല്കുമെന്ന് ചുമതലയേറ്റെടുത്ത ശേഷം വി. ചെല്സസിനി പറഞ്ഞു. ദുരന്തബാധിതരുടെ പുനരധിവാസം, പ്രകൃതി ദുരന്തങ്ങള് തടയുന്നതിന് മുന്നറിയിപ്പ് ലഭ്യമാക്കല്, ഗോത്രവര്ഗ്ഗക്കാരുടെ പ്രശ്നങ്ങള്, മനുഷ്യ-വന്യജീവി സംഘര്ഷം, ഇക്കോ സെന്സിറ്റീവ് സോണുമായി ബന്ധപ്പെട്ട റിപ്പോര്ട്ടുകള് എന്നിവ ആഴത്തില് പഠിച്ച് നടപടികള് സ്വീകരിക്കും.ജില്ലയുടെ പരിസ്ഥിതിക്ക് അനുയോജ്യമായ രീതിയില് ടൂറിസം മേഖലയെ വികസിപ്പിക്കുന്നതില് പ്രാധാന്യം നല്കും. മുന് കലക്ടറുടെ നേതൃത്വത്തില് നടന്ന മികച്ച പ്രവര്ത്തനങ്ങളുടെ തുടര്ച്ച ഉറപ്പാക്കി എല്ലാവരുടെയും കൂട്ടായ പിന്തുണയോടെ മുന്നോട്ടുപോകുമെന്നും കലക്ടര് പറഞ്ഞു.
