മുബൈ∙ സ്മിത്ത് മച്ഛാറിനൊപ്പം 14 വർഷം മുൻപ് വിമാനം പറത്തിയ അനുഭവം പങ്കുവച്ച് മുൻ വ്യോമസേന പൈലറ്റ് വിങ് കമാൻഡർ അവിനാശ് ചിക്തേ. വ്യോമസേനയിൽനിന്നു വിരമിച്ചശേഷം വാണിജ്യ കമ്പനിയുടെ യാത്രാ വിമാനത്തിൽ പൈലറ്റായും പൈലറ്റുമാരുടെ പരിശീലകനായും പ്രവർത്തിക്കുകയാണ് അവിനാശ് ചിക്തേ ഇപ്പോൾ. 14 വർഷം മുൻപാണ് താൻ ധീരനായ സ്മിത്ത് മച്ഛാറിനൊപ്പം വിമാനം പറത്തിയതെന്നും എപ്പോഴും പുഞ്ചിരിക്കുന്ന സ്വഭാവമാണ് സ്മിത്തിനുണ്ടായിരുന്നതെന്നും അവിനാശ് ചിക്തേ പിടിഐയ്ക്ക് അനുവദിച്ച അഭിമുഖത്തിൽ പറയുന്നു.കോക്ക്പിറ്റിലെ അസാധാരണമായ സാഹചര്യത്തെ സ്മിത്ത് നേരിട്ടതിൽ തനിക്കു അതിയായ അഭിമാനമുണ്ടെന്നും ഒരിക്കലും പൈലറ്റുമാർ പരിശീലിക്കാത്ത കാര്യമാണ് സ്മിത്ത് നേരിട്ടതെന്നും അവിനാശ് ചിക്തേ പറഞ്ഞു. ‘‘വിമാനത്തിൽ അസാധാരണമായ സാഹചര്യങ്ങൾ എങ്ങനെ നേരിടണം എന്നതിനെ കുറിച്ച് പൈലറ്റുമാർക്ക് പരിശീലനം ലഭിക്കും. വിമാനത്തിലെ യാത്രക്കാരനോ ക്രൂ അംഗത്തിനോ പെട്ടെന്ന് വൈദ്യ സഹായം വേണ്ടിവരിക, ഹൈജാക്കിങ് അടക്കമുള്ള സാഹചര്യങ്ങളിൽ എങ്ങനെ പ്രവർത്തിക്കണം എന്നതിലെല്ലാം പാലിക്കേണ്ട പ്രോട്ടോക്കോളും നടപടിക്രമങ്ങളും പൈലറ്റുമാരുടെ പരിശീലനത്തിൽ ഉൾപ്പെടുത്തിയിട്ടുണ്ട്. എന്നാൽ അക്രമാസക്തനായ കോ-പൈലറ്റിനെ എങ്ങനെ കൈകാര്യം ചെയ്യണം എന്നതിനെ കുറിച്ച് ഒരിടത്തും ഇതുവരെ ചർച്ച ചെയ്യപ്പെടാത്ത കാര്യമാണ്. ഒരിക്കലും ഒരു പൈലറ്റും അങ്ങനെ പെരുമാറുമെന്ന് ആരും പ്രതീക്ഷിക്കുന്നില്ല’’ – അവിനാശ് ചിക്തേ പറയുന്നു.‘‘വിമാനത്തിൽ കയറുന്നതിനു മുൻപ് പരിശോധനയ്ക്കു വിധേയമാകുന്നതിനാൽ സ്മിത്തിനെ ആക്രമിച്ച സഹപൈലറ്റ് ആയുധങ്ങൾ കൊണ്ടുപോകാൻ സാധ്യത കുറവാണ്. പകരം കോക്പിറ്റിൽ സൂക്ഷിക്കുന്ന ക്രാഷ് ആക്സ് ഉപയോഗിച്ചാവും സഹപൈലറ്റ് സ്മിത്തിനെ ആക്രമിച്ചിട്ടുണ്ടാവുക. ഇപ്പോഴത്തെ സംഭവത്തിനു ശേഷം ആരോഗ്യ വിവരങ്ങൾ സ്മിത്തിന്റെ സഹോദരനെ വിളിച്ച് തിരക്കിയിരുന്നു. സുഖം പ്രാപിക്കുന്നുണ്ടെന്നാണ് അദ്ദേഹം പറഞ്ഞത്’’ – അവിനാശ് ചിക്തേ പറയുന്നു. ധീരതയ്ക്കുള്ള പുരസ്കാരം നൽകാൻ വേണ്ടി രാജ്യം സ്മിത്തിനെ പരിഗണിക്കുമെന്ന് ഉറപ്പാണെന്നും അഭിമുഖത്തിൽ മുൻ വ്യോമസേന ഉദ്യോഗസ്ഥൻ പ്രത്യാശ പ്രകടിപ്പിച്ചു.
Read More
ആകാശഭീകരത; വിമാനത്തിൽ സഹ പൈലറ്റ് ക്യാപ്റ്റനെ കുത്തി, ഭീകരാക്രമണശ്രമമെന്ന് ഇസ്രയേൽ
ചെന്നൈയിൽ വ്യോമസേന പരിശീലന വിമാനം തകർന്ന് വീണു; അന്വേഷണം പ്രഖ്യാപിച്ചു
മുംബൈയിൽ കോവിഡ് കുതിക്കുന്നു; 82 ശതമാനം വർധന
അഹമ്മദാബാദ് വിമാന അപകടം; എഞ്ചിനിലേക്കുള്ള ഇന്ധന സ്വിച്ചുകൾ ഓഫായി; രണ്ട് എഞ്ചിനുകളും പ്രവർത്തന രഹിതമായി; അന്വേഷണ റിപ്പോർട്ട്
