ദുബായ്∙ ഫ്ലൈദുബായ് വിമാനത്തിലെ കോക്പിറ്റിനുള്ളിൽ അപ്രതീക്ഷിതമായി നടന്ന അക്രമത്തിൽ ഗുരുതരമായി പരുക്കേറ്റ് ചികിത്സയിൽ കഴിയുന്ന ഇന്ത്യൻ ക്യാപ്റ്റൻ സ്മിത് മച്ഛാർ, വിമാനം തകർച്ചയുടെ വക്കിലെത്തിയ ആ ഭീതിജനകമായ നിമിഷങ്ങൾ ഓർത്തെടുക്കുന്നു. യുഎഇയുടെ ഫ്ലൈ ദുബായ് എഫ്സെഡ് 1073 വിമാനത്തിൽ 174 യാത്രക്കാരുടെ ജീവൻ രക്ഷിക്കാൻ കോക്പിറ്റിൽ നടന്ന പോരാട്ടം വിവരിക്കവെ തന്റെ കാഴ്ചശക്തി പൂർണമായും മങ്ങിപ്പോയ അവസ്ഥയിലായിരുന്നുവെന്നും വിമാനം കുത്തനെ താഴേക്ക് പതിക്കുകയായിരുന്നുവെന്നും ക്യാപ്റ്റൻ വെളിപ്പെടുത്തി. ടെൽ അവീവിലേക്കുള്ള യാത്രയ്ക്കിടെ സാധാരണപോലെ സഹ പൈലറ്റ് പ്രാർഥിക്കുകയായിരുന്നു. മര്യാദയുടെ ഭാഗമായി ക്യാപ്റ്റൻ മുന്നോട്ടു നോക്കി ഇരുന്ന സമയത്താണ് പെട്ടെന്ന് തലയ്ക്ക് പിന്നിൽ അതിശക്തമായ അടികിട്ടിയത്. ആദ്യഘട്ടത്തിൽ വിമാനത്തിന് എന്തോ വൻ സാങ്കേതിക തകരാർ സംഭവിച്ചതാണെന്നാണ് വിചാരിച്ചതെന്നും എന്നാൽ തുടർച്ചയായി തലയിൽ അടികൾ വന്നതോടെയാണ് ഒപ്പമുള്ളയാൾ തന്നെ ആക്രമിക്കുകയാണെന്ന് മനസ്സിലായതെന്നും അദ്ദേഹം പറഞ്ഞു.
∙ പോരാടിയത് 174 യാത്രക്കാരുടെ ജീവനുവേണ്ടി
ആക്രമണത്തിന്റെ ആഘാതത്തിൽ കാഴ്ച മങ്ങുകയും ചോരയിൽ കുളിക്കുകയും ചെയ്ത അവസ്ഥയിലും വിമാനം നിയന്ത്രണം വിട്ട് താഴ്ന്നു പറക്കുകയാണെന്ന് സ്മിത് തിരിച്ചറിഞ്ഞു. 34,000 അടി ഉയരത്തിൽ പറക്കുകയായിരുന്ന വിമാനം മിനിറ്റുകൾക്കുള്ളിൽ പതിനേഴായിരത്തോളം അടി താഴേക്ക് പതിച്ചു. ഇതിനിടയിൽ ആക്രമിയുടെ പിടിയിൽനിന്ന് രക്ഷപ്പെട്ട് കോക്പിറ്റിന്റെ വാതിൽ തുറക്കാൻ ശ്രമിച്ചെങ്കിലും അക്രമി വാതിൽ വീണ്ടും അടച്ചു. തുടർന്ന് കോക്പിറ്റിന്റെ തറയിലേക്ക് വീണുപോയെങ്കിലും, യാത്രക്കാരുടെ നിലവിളിയും വിമാനത്തിന്റെ ഭീതിജനകമായ ശബ്ദവും കേട്ടതോടെ ശേഷിച്ച അവസാന ശക്തിയും സംഭരിച്ച് വാതിൽ തുറക്കുകയായിരുന്നു. പുറത്തു കാത്തുനിന്നവർ ഉടൻതന്നെ കോക്പിറ്റിലേക്ക് ഇരച്ചുകയറി സ്ഥിതിഗതികൾ നിയന്ത്രണത്തിലാക്കി. ഈ നിർണായക നീക്കമാണ് വൻ ദുരന്തം ഒഴിവാക്കിയത്. പിന്നീട് വിമാനം സൗദി അറേബ്യയിലെ തബൂക്ക് വിമാനത്താവളത്തിലേക്ക് അടിയന്തരമായി തിരിച്ചുവിട്ടു. മുംബൈ സ്വദേശിയായ സ്മിത് മഛാറിന് വ്യാവസായിക വ്യോമയാന മേഖലയിൽ 13 വർഷത്തിലേറെ പരിചയസമ്പത്തുണ്ട്.
∙ തീവ്രവാദ ആക്രമണമെന്ന് അന്വേഷണ റിപ്പോർട്ട്
വിമാനത്തിൽ നടന്നത് തീവ്രവാദ ആക്രമണ ശ്രമമാണെന്ന് പ്രാഥമിക അന്വേഷണ റിപ്പോർട്ട് വ്യക്തമാക്കുന്നതായി യുഎഇ അധികൃതർ സ്ഥിരീകരിച്ചു. കോക്പിറ്റിലുണ്ടായിരുന്ന കോ പൈലറ്റ് ആക്സ് ഉപയോഗിച്ചാണ് ക്യാപ്റ്റനെ ആക്രമിച്ചതെന്നും വിമാനത്തിന്റെ നിയന്ത്രണം ഏറ്റെടുക്കാൻ ശ്രമിച്ചെന്നുമാണ് കണ്ടെത്തൽ. ഒമാൻ സ്വദേശിയായ ഹമാം അൽ ഹമ്മാമിയാണ് ആക്രമണം നടത്തിയതെന്ന് മാധ്യമങ്ങൾ റിപ്പോർട്ട് ചെയ്തെങ്കിലും ഔദ്യോഗിക സ്ഥിരീകരണം വന്നിട്ടില്ല. ഇയാൾ മുൻപ് തീവ്രനിലപാടുകൾ പുലർത്തിയതിന്റെ പേരിൽ ഒമാനിൽ വിമാനം പറത്തുന്നതിൽനിന്ന് വിലക്ക് നേരിട്ടിരുന്നതായും റിപ്പോർട്ടുകളുണ്ട്. സംഭവത്തിൽ യുഎഇ ഭരണകൂടം വിശദമായ രാജ്യാന്തര അന്വേഷണം തുടരുകയാണ്.
Read More
നടന്നത് പ്രകോപനം ഇല്ലാതെ ഉണ്ടായ ആക്രമണം, മരണം ഉറപ്പിച്ച സമയത്താണ് അവസാനമായി ഒരുവട്ടം കൂടി പോരാടാൻ തീരുമാനിച്ചത്; സ്മിത് മച്ഛാർ
സഹപൈലറ്റിന്റെ കുത്തേറ്റ് ചോരവാര്‍ന്നപ്പോഴും വിമാനം നിയന്ത്രിച്ച് യാത്രക്കാരെ കാത്തു; ധീരനായ ഇന്ത്യന്‍ പൈലറ്റിന് നന്ദി പറഞ്ഞും വാഴ്ത്തിയും ലോകം
ആകാശഭീകരത; വിമാനത്തിൽ സഹ പൈലറ്റ് ക്യാപ്റ്റനെ കുത്തി, ഭീകരാക്രമണശ്രമമെന്ന് ഇസ്രയേൽ
പൈലറ്റ് ഉറക്കമരുന്നു കഴിച്ചിരുന്നു; വിമാനം താഴ്ന്നപ്പോൾ നിലത്തിരുന്നു: വഴിത്തിരിവായി റിപ്പോർട്ട്
