കൊച്ചി: സിഎംആര്‍എല്‍-എക്സാലോജിക് സാമ്പത്തിക ഇടപാട് കേസില്‍ പിണറായി വിജയന്റെ അപ്പീല്‍ ഹൈക്കോടതി തിങ്കളാഴ്ച പരിഗണിക്കും. നേരത്തെ അപ്പീല്‍ അനുമതി നിരസിച്ച, ജസ്റ്റിസ് കെ നടരാജന്‍ അധ്യക്ഷനായ ഡിവിഷന്‍ ബെഞ്ചാണ് വാദം കേള്‍ക്കുക. മാസപ്പടി കേസിലെ വിജിലന്‍സ് അന്വേഷണം 10 ദിവസത്തേക്കാണ് സുപ്രീംകോടതി സ്റ്റേ ചെയ്തത്. ഇക്കാര്യം ചൂണ്ടിക്കാട്ടിയ അഭിഭാഷകരോട് ഇനിയും സമയമുണ്ടല്ലോ എന്നാണ് കോടതി പറഞ്ഞത്.
അപ്പീല്‍ പരിഗണിക്കണമെന്ന സുപ്രീംകോടതി ഉത്തരവ് പിണറായി വിജയന് ഇന്നലെ ഹൈകോടതിയില്‍ ഹാജരാക്കിയിരുന്നു. ഇന്ന് ജസ്റ്റിസ് സതീഷ് നൈനാന്‍ അധ്യക്ഷനായ ബെഞ്ചില്‍ മുന്‍പാകെ കേസ് പ്രത്യേകമായി ഉന്നയിച്ചു. എന്നാല്‍, തിങ്കളാഴ്ച്ച ജസ്റ്റിസ് കെ നടരാജന്‍ അധ്യക്ഷനായ ബെഞ്ച് പരിഗണിക്കുമെന്ന് കോടതി വ്യക്തമാക്കി.
കേസില്‍ ഇഡിയുടെ ചോദ്യം ചെയ്യലിന് പിണറായി വിജയന് ഇന്ന് ഹാജരാകില്ല. സുപ്രീംകോടതി ഇടപെടലും നിയമസഭാ സമ്മേളനവും ചൂണ്ടിക്കാട്ടി സമന്‍സിന് മറുപടി നല്‍കി. എന്നാല്‍, സുപ്രീംകോടതി വിധി വിജിലന്‍സ് കേസിന് മാത്രം ബാധകമെന്നും, ഇസിഐആറിന് സ്റ്റേ ഇല്ലാത്തിടത്തോളം അന്വേഷണവുമായി മുന്നോട്ട് പോകുമെന്നും ഇ ഡി. പിണറായി വിജയന്റെ മറുപടി പരിശോധിച്ച ശേഷം വീണ്ടും നോട്ടീസ് നല്‍കാനാണ് ആലോചന.
സുപ്രീം കോടതി പിഎംഎല്‍എ കേസിന് ബാധകമല്ലെന്ന നിലപാടാണ് ഇഡിയ്ക്ക് ഉള്ളത്. അതിനാല്‍ അന്വേഷണത്തില്‍ നിന്ന് പിന്നോട്ടില്ല. ഹൈകോടതി നടപടികള്‍ അടക്കം പരിഗണിച്ച് തുടര്‍ നീക്കങ്ങള്‍ ആലോചിക്കും.
